Гасниот интерконектор Србија-Бугарија ќе биде пуштен во пробна работа денес, соопштија за Танјуг од Министерството за рударство и енергетика.
Завршени се сите работи на гасоводот кон Бугарија, што ќе овозможи побезбедно и постабилно снабдување со гас од различни извори, особено од Азербејџан. Изградбата на нов гасовод во должина од 109 километри од Ниш до Димитровград траеше 12 месеци. Вкупната должина на двонасочниот гасовод Србија-Бугарија е 170 километри, од Нови Искар кај Софија до Ниш.
Во Србија беа изградени четири мерни и регулациони станици во Пирот, Димитровград, Бела Паланка и Ниш, како и една голема далноводна станица во Трупале кај Ниш. Србија потпиша договор за интерконекција со Булгартрансгас и комерцијален договор за снабдување до 400 милиони кубни метри гас од Азербејџан до крајот на 2024 година.
Во ноември, бугарскиот оператор за пренос на гас Булгартрансгас ЕАД и транспортниот систем оператор Транспортгас Србија потпишаа договор за интерконекција на новата точка Калотина-Димитровград на новоизградениот интерконектор Бугарија-Србија. Од Азербејџан до 2026 година се очекува Србија да добива до 400 милиони кубни метри гас годишно, додека од 2027 година тие количини може да се зголемат и до три пати.
Извор- Б92
Фото – Wikimedia
