: Кога природата создава нешто толку волшебно како опашката на паунот, тоа е многу повеќе од само блесок светлина. Научниците сега открија дека нивните познати пердувести опашки не само што светат, туку всушност можат да функционираат како природни ласери.
Во студија објавена во списанието Scientific Reports, истражувачи од Политехничкиот универзитет во Флорида и Државниот универзитет Јангстаун во САД примениле специјални бои на различни области од пауновите опашки за да го следат однесувањето на светлината. Тие посветиле посебно внимание на карактеристичните „очи“ на пердувите. Во рамките на овие региони, тие детектирале слабо зрачење на две специфични бранови должини – зелена и жолто-портокалова.
Терминот „ласер“ се однесува на засилување на светлината со стимулирана емисија на зрачење. Иако биолошкото засилување на светлината е познато во природата, за да се произведе вистински ласерски зрак, потребна е оптичка празнина, т.е. простор во кој светлинските бранови се порамнети со рефлексија помеѓу границите. Според истражувачите, “очите” на прекрасните пердуви на паунот имаат уникатни својства што ги усогласуваат светлосните бранови со нивно одбивање напред-назад, ефикасно претворајќи ги во жолто-зелени ласери.
Иако точната наноструктура одговорна за усогласување на светлината сè уште не е идентификувана, нивното присуство во сите “очи” на пердувите на паунот и нивната конзистентна и карактеристична емисија сугерираат природно развиен систем за засилување на светлината. Паунот на тој начин станува првото познато животно чии телесни структури можат да емитуваат ласерска светлина.
Разбирањето на овие биолошки резонатори би можело да поттикне напредок во дизајнот на ласери или да ѝ помогне на биологијата да развие нови дијагностички алатки.
Зошто пауните еволуирале со такви карактеристики останува непознато, но научниците шпекулираат дека тие можат да служат во прикази што само другите птици можат да ги видат.
( Science Alert)
(Фото: Picryl)
