Владата на австралиската држава Викторија сака да го регулира правото на работа од далечина, и покрај противењето на дел од деловната заедница, кои предупредуваат на потенцијални проблеми со продуктивноста.
Некои од најголемите компании во Австралија ќе бидат законски обврзани да им дозволат на вработените да работат од дома два дена во неделата откако владата објави дека ќе донесе закон со кој работата од далечина ќе стане законско право.
Мелбурн, главниот град на Викторија и најголемиот град во Австралија, е дом на голем број големи работодавци, вклучувајќи ги BHP, Rio Tinto, ANZ Bank, Telstra и некои од најголемите фондови за пензиско осигурување во земјата.
Лабуристичката влада на државата предложи вработените во јавниот и приватниот сектор да имаат законско право да работат од далечина два дена во неделата од септември, каде што е можно. Малите бизниси ќе имаат подолг период на прилагодување.
„Работата од дома функционира за семејствата бидејќи заштедува време и пари и им овозможува на повеќе родители да работат“, рече премиерката Џасинта Алан, објаснувајќи ја одлуката.
Нејзината влада се соочува со избори во ноември, а спроведувањето на ветувањето за законска заштита на правото на работа од далечина ќе биде дел од нејзината кампања за реизбор.
Работата од дома беше и политички чувствително прашање за време на минатогодишната национална изборна кампања, кога опозициската Либерална партија вети дека ќе се справи со она што го нарече „неодржливи“ модели на работа од далечина во јавниот сектор и побара вработените да бидат во канцеларија пет дена во неделата.
Овој потег на владата доаѓа во време кога многу бизнис лидери повикуваат вработените почесто да се враќаат во канцеларијата. Нуно Матос, кој ја презеде функцијата извршен директор на ANZ минатата година, рече дека малото присуство во канцеларијата ќе резултира со пониски бонуси во банката. Бизнис групите предупредија дека законодавството може да ги чини работни места во Викторија за други држави и може да ги забави напорите за зголемување на продуктивноста во Австралија.
Повеќето големи компании веќе имаат флексибилни модели на работа, но помалите бизниси може да имаат потешкотии да се прилагодат на предложеното законодавство. Оние со помалку од 15 вработени ќе имаат рок до јули следната година да го сторат тоа.
Скај Капучо, извршен директор на Советот на организации за мали бизниси во Австралија, рече дека новото законодавство ќе создаде дополнителни административни оптоварувања и неизвесност за сопствениците на бизниси.
„Многу мали бизниси се потпираат на соработка лице в лице, надзор, менторство и учење на работното место за да развијат вештини и да ја одржат продуктивноста. Претворањето на работата од дома во државен закон, а не во договор меѓу работодавачот и вработениот, би можело да ги оштети тие односи“, додаде таа.
(Financial Times/Forbes hr)
