Италијанските сенатори презентираа закон со кој платформите на социјалните медиуми ќе бидат поодговорни за начинот на кој дистрибуираат содржина до корисниците, како дел од борбата против зависноста од овие платформи.
Предлогот, поддржан од опозициската Демократска партија (PD), ќе бара од платформите да престанат со автоматско профилирање на корисниците и да обезбедат поголема транспарентност во функционирањето на алгоритмите што ја одредуваат содржината што ја гледаат корисниците, објави Ројтерс.
„Секој пат кога отвораме социјална мрежа, алгоритам одлучува што ќе видиме, не случајно, туку за да нè држи залепени за екранот што е можно подолго“, рече сенаторот од PD, Антонио Ничита.
Предлог-законот нагласува дека дизајнот на алгоритмите не е технички детаљ, туку корпоративен избор со последици и би ги направил платформите одговорни за дизајнот на системите за дистрибуција на содржини.
Во посебен предлог владејачката партија Лига предложи забрана за користење на социјалните медиуми од страна на деца под 14 години, моделирана според слични мерки што веќе се усвоени или се разгледуваат во неколку земји.
(B92)
