Научници од Кабардино-Балкарскиот универзитет развија робот за играње шах за да им помогнат на студентите подобро да ги разберат принципите на програмирање.
- “Создаден е уникатен систем способен самостојно да игра шах. Станува збор за роботска рака која комбинира хардвер и софтвер и вклучува елементи на роботика, машински компоненти, контрола на алгоритми и вештачка интелигенција” објави универзитетот.
Според соопштението, роботот ја набљудува шаховската табла користејќи 3Д камера која ги препознава фигурите, ја одредува нивната позиција, ги следи движењата на противникот и забележува можни грешки.
- “Специјално дизајниран држач стана клучен елемент на системот. Неговата единствена способност да ја почувствува и да ја контролира силата на држачот е од клучно значење. Роботот реагира многу брзо – препознавањето на позицијата и донесувањето одлуки трае од 0,1 до две секунди. Сепак, физичкото поместување на фигурата трае четири до десет секунди поради механиката” изјавија научниците.
Тие додаваат дека роботот е шахист на ниво на меѓународен велемајстор и може однапред да пресмета десетина потези.
- “Сепак, важно е да се запомни дека шахот не е само за пресметување варијации, туку и за интуиција и разбирање на позицијата” објасни Мухамед Кипов, раководител на тимот за развој и раководител на Лабораторијата за интелигентни системи и анализа на податоци.
Како што истакнуваат, проектот има не само истражувачка, туку и значајна образовна вредност, бидејќи преку работа со овој систем учениците учат да размислуваат како инженери.
Манипулаторот им помага да стекнат подлабоко разбирање на принципите на дизајнирање и програмирање, што е клучно за нивниот иден професионален развој. Следниот чекор во развојот на проектот ќе биде креирање на веб-платформа што ќе им овозможи на корисниците да се регистрираат за да играат со роботот, да ги следат резултатите и рангирањата, како и да учествуваат во шаховски турнири и образовни програми.
(Kamatica)
