Alphabet и Google официјално го објавија планот за собирање дури 80 милијарди долари, кои ќе бидат инвестирани директно во проширување и скалирање на инфраструктурата за вештачка интелигенција. Компаниите ќе ги добијат овие средства преку стратешка продажба на сопствени акции на пазарот.
Планираниот финансиски пакет ќе се имплементира преку три клучни канали:
-30 милијарди долари преку јавна понуда на акции
-40 милијарди долари преку програма за последователна продажба на акции со текот на времето (на пазарот) и
-10 милијарди долари преку приватна понуда, директно финансирана од инвестициската фирма Berkshire Hathaway, предводена од Ворен Бафет.
Оваа објава доаѓа веднаш по објавувањето на одличните финансиски резултати за првиот квартал од оваа година. Во неа приходите на Alphabet забележаа зголемување од 22% на годишно ниво, достигнувајќи 110 милијарди долари. Во исто време Google забележа значаен успех, достигнувајќи ја бројката од 350 милиони платени претплати низ своите услуги.
Според официјалното соопштение, Alphabet очекува вкупните капитални расходи во 2026 година да бидат помеѓу 180 и 190 милијарди долари. Покрај тоа, се предвидува уште позначаен раст во 2027 година.
„Средствата во износ од 80 милијарди долари ќе ѝ помогнат на компанијата да финансира амбициозни инвестиции на избалансиран начин. Ќе одржуваме стабилен и здрав биланс на состојба“, објаснуваат Alphabet и Google.
Со овој потег Alphabet јасно става до знаење дека трката за развој на напредни модели на вештачка интелигенција бара масовни и континуирани инвестиции во инфраструктурата, првенствено во проширување на капацитетот на центрите за податоци и купување специјализиран хардвер, со цел да ја задржи својата водечка позиција на глобалниот пазар.
(Benchmark.rs)
