По една бледа година за својот електричен модел, Москвич го насочува своето внимание кон хибридните автомобили. Рускиот производител објави дека работи на развој на своето прво возило кое ќе комбинира бензин и електрична енергија, во време кога хибридите стануваат сè попопуларни на глобалниот пазар.
Компанијата засега не открива технички детали, но се очекува дека новиот модел ќе биде развиен со поддршка на кинески партнери, со кои Москвич веќе работи на производство на постоечки автомобили.
Извршната директорка на Москвич, Елена Фролова, потврди за рускиот весник Комерсант дека производителот дефинитивно ќе вклучи хибриден модел, но не даде дополнителни детали за техничките спецификации, датумот на лансирање или почетокот на производството.
Објавата доаѓа во време кога руската автомобилска индустрија се обидува да го забрза развојот на нови модели и да го намали заостанувањето зад глобалните трендови на електрификација. Хибридните автомобили, кои комбинираат мотор со внатрешно согорување и електричен погон, сè повеќе се појавуваат како преодно решение помеѓу класичните возила и целосно електричните автомобили. Московскиот автомобилски погон моментално тесно соработува со кинеските производители JAC и SAIC, чии модели ги склопува и продава под брендот Москвич.
Оваа стратегија ѝ овозможи на компанијата релативно брзо да го продолжи производството и да го прошири својот асортиман по повлекувањето на бројни западни производители од рускиот пазар. Еден пример за оваа соработка е кросоверот „MG HS“, кој неодамна се произведуваше под брендот „москвич M70“. Бидејќи кинескиот модел веќе има хибридна верзија, аналитичарите веруваат дека тој би можел да послужи како основа за првиот хибриден автомобил од брендот Москвич. Покрај возилата со мотори со внатрешно согорување, компанијата нуди и електричен модел, „москвич зe“.
Сепак, интересот на клиентите за овој автомобил остана многу скромен. Според руските медиуми, дилерите сè уште се обидуваат да ги продадат залихите од возила произведени во 2023 и 2024 година, што укажува дека домашниот пазар сè уште не е подготвен за масовно преминување кон електрични автомобили.
Експертите проценуваат дека хибридните модели би можеле да имаат многу поголеми шанси за успех, бидејќи нудат помала потрошувачка на гориво и емисии, а воедно не бараат развиена мрежа за полнење, која во Русија сè уште заостанува зад водечките светски пазари.
(Kamatica)
(фото: Wikimedia)
