Синдикатите на Volkswagen предупредуваат дека компанијата би можела да скрати до 140.000 работни места, вклучувајќи ги и веќе договорените намалувања, бидејќи односите меѓу менаџментот и претставниците на вработените се влошуваат.
Претседателката на работничкиот совет на Volkswagen, Даниела Кавало, изјави дека довербата во менаџментот и извршниот директор Оливер Блум е нарушена, додека Кристијане Бенер од синдикатот IG Metal предупреди дека неговите планови за намалување на трошоците и зголемување на профитот се нереални.
Блум им кажа на вработените дека околу половина од дополнителните намалувања на работни места во компанијата ќе мора да се направат во Германија, дополнително интензивирајќи го спорот со синдикатите околу реструктуирањето на најголемиот европски производител на автомобили.
Тој им кажа на вработените во главната фабрика на Volkswagen во Волфсбург дека ваквите мерки се неопходни бидејќи фиксните трошоци на компанијата се за 30 проценти повисоки од оние на нејзините конкуренти.
Тој, исто така, истакна дека често споменуваните 50.000 дополнителни отпуштања на глобално ниво не се нужно конечната бројка.
Volkswagen веќе скратува работни места во Германија, а автомобилската индустрија во земјата се соочува со послаба побарувачка, повисоки трошоци за енергија и зголемена конкуренција од кинеските производители.
Компанијата проценува дека треба да ги намали трошоците за најмалку 10 милијарди евра, а воедно да го намали и европскиот производствен капацитет за околу 500.000 возила годишно.
(021)
(фото: Wikimedia)
