Холандскиот синџир супермаркети Albert Heijn тестира револуционерен систем за намалување на цените на храната. Компјутерски управуван систем динамички ги намалува цените на храната во зависност од повеќе критериуми, а целта е да се сведе на минимум фрлањето храна на која и поминал рокот.
За намалувањето на цените одлучува алгоритам кој во реално време ги следи параметрите како: рок на траење, временски услови, количина, аналитика за продажба на даден производ и некои други. Намалувањето на цените би требало да резултира со тоа ниеден производ изложен на полиците во супермаркетот да нема истечен рок на траење.
Системот засега се тестира на месо од живина и на риби. Досега синџирот Albert Heijn на свежата риба чиј рок, да речеме, истекува денес ставал напис „Попуст од 35%, штета е да се фрли ова“. Системот со истакнати фиксни попусти е статичен и реално е неинтелигентен затоа што попустот секогаш е ист. Со динамичко одредување на цените попустот може би бил и поголем со задоволување на условите поставени во алгоритмот.
Како изгледа тоа кај нас? Производот на кој му се приближува истекување на рокот на употреба оди на акција, а кога ќе остане уште еден ден или слично посебно се означува и се истакнува на видно место.По истекот на рокот производот оди на уништување. Основниот проблем во оваа ситуација е фрлањето на храната, која ја нема во доволни количини на многу места во светот. Според проценката на Организацијата за храна и земјоделство на Обединетите нации е дека малопродажните синџири во светот годишно фрлаат храна во вредност од речиси 100 милијарди долари.
Алгоритмот за холандскиот супермаркет го разви израелскиот стартап Wasteless.
