Американската компанија за производство на електрични возила и чиста енергија Tesla, на чие чело е иноваторот Илон Маск, објави дека бесплатно ќе испорачува респиратори и потребна опрема до болниците ширум светот во екот на пандемијата на корона вирусот.
„Имаме респиратори кои ги одобри американската Агенција за храна и лекови. Ги доставуваме до болници ширум светот во регионите на испорака на Teslа. Уредите и доставата се бесплатни. Единствено што бараме е респираторите да почнат веднаш да се користат на пациенти на кои им се потребни, а не да се чуваат во складишта“, објави Маск на Twitter.
Маск ги повика заинтересираните да стапат во контакт со него директно или со Teslа. Тој минатата седмица изјави дека од Кина купиле повеќе од 1.200 респиратори и дека ги донеле во САД.
