После повеќемесечна лабораториска работа експертскиот тим од Технолошко-металуршкиот факултет (ТМФ) и Inno Fab Lab ја претставуваат својата најнова иновација – функционален рециклиран филамент за 3D-принтање добиен од отпадна пластика.
Во продолжение погледнете го видеото во кое професор д-р Игор Јорданов објаснува како е добиен овој иновативен и уникатен производ, ги претставува чекорите на развојната постапка и зборува за неговата економска оправданост и потенцијал за идно производство. Дополнително, студентките Ана-Марија Вцановска, Мила Ќурчиева и Ема Ицковска ги споделуваат своите искуства од работата на проектот, како и придобивките од практичната примена на напредните технологии за рециклирање.
Проектот претставува значаен чекор кон развој на одржливи материјали и паметно управување со отпадот. Тимот успеа да креира филамент кој по квалитет и стабилност се приближува до комерцијалните материјали, а е изработен од пластика која инаку би завршила како отпад. Процесот опфаќа селекција на материјал, дробење, пелетизација и прецизно екструдирање на нова 3D-нишка подготвена за употреба.
Резултатите од испитувањата покажуваат дека рециклираниот филамент е функционален, има конзистентни својства и овозможува стабилно 3D-принтање на различни геометрии. Ова ја потврдува неговата практична примена во прототипирање, едукативни програми, лаборатории и maker-заедници.
Иновацијата е пример како научната заедница и креативните лаборатории во земјава можат да создадат решенија што го намалуваат отпадот и истовремено ја поттикнуваат локалната технолошка индустрија. Проектот отвора можност за натамошен развој, тестирање нови состави на материјал и потенцијално скалирање на производството.
Со овој производ, ТМФ и Inno Fab Lab покажуваат дека рециклирањето може да стане дел од напредните технологии, а отпадната пластика – вреден ресурс за нови иновативни апликации.
Оваа активност е дел од проектот „Рециклиран филамент за 3Д принтање“ преку програмата „Екосистем за еко-иновации и циркуларна економија на Западен Балкан“ (EICEE – Western Balkan Eco-Innovation and Circular Economy Ecosystem) – проект кофинансирана од Европската Унија и Владата на Црна Гора.
