Оваа година почнувајќи од 11 мај (петок) Skopje City Mall во соработка со Координативното тело на регулаторните институции за финансиска едукација во Македонија, Народна банка на Република Македонија, Министерството за финансии, Агенцијата за супервизија на осигурувањето, Комисијата за хартии од вредност и Агенцијата за супервизија на капитално финансирано пензиско осигурување, организираат „Денови на финансиска писменост”, јавен настан со кој ќе се стави силен акцент на финансиската едукација кај луѓето, ќе се подигне нивото и општата свест за постигнување на поголема финансиска писменост.
На овој тридневен мултимедијален настан, свое учество ќе земат голем број на финансиски институции, меѓу кои: банки, штедилници, осигурителни компании, брокерски друштва, инвестициски фондови, приватни пензиски фондови, како и микрофинансиски институции.
Настанот ќе овозможи едукација преку изложбен дел каде што посетителите ќе можат да се информираат за сите финансиски параметри во врска со одредени теми кои ги засегаат посетителите, ќе има презентации на одредени продукти од учесниците, како и голема забава за најмладите вклучувајќи ги во проекти со кои од рана возраст ќе се влијае на нивната финансиска едукација.
Според организаторите, „Денови на финансиска писменост“ претставува настан кој треба секој да го посети.
„Ни претставува огромна чест и задоволство што во соработка со Народна банка на Република Македонија сме организатори на еден ваков голем општествено едукативен проект. „Денови на финансиска писменост“ има за цел да ја зголеми финансиската писменост кај посетителите и да ги поттикне факторите за транспарентност и едукација. Сакаме да им овозможиме на граѓаните преку еден мултимедијален пристап да го подобрат своето знаење во врска со финансиските производи” изјавија од Skopje City Mall.
Настанот ќе започне во петок на 11 мај, а ќе трае 3 дена до 13 мај. Мултимедијалните пултови ќе бидат отворени во период од 12 до 20 часот.
