Дел од ракетата на SpaceX, тешка околу четири тони, веројатно ја погодила површината на Месечината и не претставувала закана за Земјата.
Сепак, се очекува дека формирала нов кратер за време на ударот со голема брзина, објави американската вселенска агенција НАСА, додавајќи дека настанот не бил видлив бидејќи, очигледно, се случил на границата на видливиот и невидливиот дел од Месечината. Станува збор за дел од ракетата Falcon 9, приближно висока колку петкатна зграда, која лансираше два комерцијални лендери на Месечината во јануари 2025 година – еден американски и еден јапонски.
Според пресметките на астрономите, дел од ракетата требало да ја погоди површината на Месечината со брзина од околу 8.690 километри на час. Според Гардијан, се очекувало ударот да подигне облак од месечева прашина долг неколку километри, но не бил лесно видлив од Земјата со голо око.
Професионалните и аматерските астрономи, и покрај употребата на моќни телескопи и специјализирани камери, не беа во можност да го потврдат моментот на ударот, веројатно затоа што местото на ударот се наоѓа близу до работ на видливиот дел од Месечината.
НАСА проценува дека ударот можеби формирал кратер со дијаметар од околу 18 метри и длабочина од околу четири метри, со прашина и карпест материјал исфрлен од кратерот. Агенцијата објави дека собраните податоци ќе им помогнат на научниците подобро да ги разберат последиците од вештачките удари врз површината на Месечината и да ги подобрат методите за следење на објектите во вселената.
Портпаролот на НАСА, Џими Расел, изјави дека настанот не претставува закана за Земјата и дека научниците ќе ги користат податоците за да ги подобрат техниките за следење на вселенските објекти.
Директорката на програмата за наука „Драгон“ на НАСА и „Спејс Икс“, Џулијан Шајман, изјави дека комбинација од сончева активност и гравитациски сили насочила дел од ракетата кон Месечината.
Во последниве години, неколку вселенски летала наменети за меки слетувања завршија со пад на Месечината, вклучувајќи ја руската мисија Луна-25 во 2023 година, индиската мисија Чандрајан-2 во 2019 година и израелскиот лендер Берешит, кој исто така се урна на површината на Месечината истата година.
(Б92)
Фото – Dawn
