Малите и средните претпријатија во Германија трошат 61 милијарда евра годишно само на бирократија, што е разумно неопходно за правилно функционирање на економијата, според германската банка за развој KfW.
Во објавеното истражување пишува дека вработените во околу 3,8 милиони вакви компании во Германија просечно трошат седум проценти од своето работно време на бирократски процедури. Ова, како што е пресметано, е во просек од околу 32 работни часа месечно по компанија, или вкупно 1,5 милијарди работни часови годишно.
Истражувањете, кое KfW го спроведува редовно од 2002 година, опфати 10.000 мали и средни претпријатија од сите економски сектори и од сите големини. Според податоците на Заводот за статистика, вкупната просечна цена на работен час во Германија во 2023 година изнесувала 41,30 евра.
Мерено според оваа вредност, минатата година компаниите издвоиле 61 милијарда евра за државни бирократски обврски, што одговара на околу 3,9 проценти од сите годишни трошоци за персонал на малите и средните компании. Не ги вклучува обврските што не можат да се изразат како работно време, како што се долгорочно планирање или процедури за добивање дозволи, проблеми со пристап до административните органи или спорни толкувања на одредени правила.
Во анкетата како дел од бирократските должности се наведени должностите за документирање и составување информации, пополнување обрасци, на пример за даноци и социјално осигурување, како и времето потребно компаниите да се придржуваат кон законските одредби и правила, на пример во областа на заштитата на податоците, работничките права, екологијата или минималните технички стандарди. Како најголеми предизвици, испитаниците ги споменаа даночните обврски, обврската за чување и составување документација и сметководствените обврски.
„Психолошката цена на комуникацијата со бирократијата игра голема улога за многу претприемачи. Едно е јасно – од перспектива на малите и средни претпријатија, факторот бирократија е убедливо најголемиот ризик за конкурентноста и за Германија како производна дестинација“, рече експертот на KfW, Михаел Шварц.
Истражувањето покажа дека самовработените имаат највисоки бирократски трошоци. Во просек, тие користат 8,7 проценти од своето работно време за извршување на бирократски задачи, а со зголемувањето на бројот на вработени во компаниите, тоа време поминато во нив се намалува. Шварц истакнува дека бирократијата е неопходна, но дека напорот што го бара не треба да биде поголем од користа.
„Терминот бирократија има многу негативна конотација. Во исто време, бирократијата е еден од темелите на нашиот економски систем. Стандардизираните и формализирани процедури се предуслов за дејствување во согласност со правилата, за владеење на правото и фер конкуренција на пазарот. Сепак, со растот на бирократијата, постои растечка опасност трошоците да ги надминат придобивките. Затоа намалувањето на бирократијата во моментов е најважната тема на економската политика од перспектива на малите и средни претпријатија“, рече Шварц.
Фото – Pixabay
