Листот кај растенијата е неверојатна мала машина која ја претвора сончевата светлина и јаглерод диоксидот во енергија за растението. Вештачките верзии, пак, може да се користат како извори на обновлива енергија, па дури и за производство на гориво. Истражувачи од Универзитетот Кембриџ создадоа вештачки лист кој произведува синтетички гас без да испушта јаглерод диоксид.
Синтетичкиот гас е составен од водород и јаглерод моноксид, понекогаш со мала количина јаглерод диоксид. Додека, технички тој гас може да се согорува и да се генерира електрична енергија или да се користи за осветлување и загревање, почесто се користи како преоден чекор во производствените процеси за добивање пластика, ѓубрива и горива од типот на дизел. За жал, производството на таков гас испушта јаглерод диоксид во атмосферата.
Тимот од Кембриџ, пак, разви прототип на нов вид вештачки лист кој може да произведува синтетички гас преку фотосинтеза. Новиот уред содржи два апсорбери на светлина направени од перовскајт и кобалтен катализатор. Кога тие ќе се постават во вода, едната страна произведува кислород, додека другата го разложува јаглерод диоксидот на јаглерод моноксид и водород. Тие два гаса потоа се комбинираат за да се добие синтетички гас.
Тимот докажа дека оваа технологија може да функционира дури и при релативно слаба светлина како кога е облачно и да создава струја. Кобалтот, пак, во катализаторот е евтин и е многу поефикасен за создавање јаглерод моноксид отколку другите материјали. Засега стапката на конверзија е уште ниска – новиот дизајн произведува водород со ефикасност од 0,06%, а јаглерод моноксид со ефикасност од 0,02%. Крајната цел на тимот од Кембриџ е да се прескокне фазата од производството на синтетички гас при која се испушта јаглерод диоксид.
