NASA Space Apps Challenge привлече 120 учесници од земјата кои развиваа вештини за иновативно решавање на сегашни и идни предизвици
Два македонски тима составени од 9 млади девојки и момчиња на возраст од 15 до 19 години ќе не претставуваат на светскиот натпревар за иновации за Земјата и Вселената NASA Space Apps Challenge во организација на вселенската агенција NASA и ќе имаат можност да ги презентираат своите проекти пред врвни експерти. Двата победнички тима интензивно работеа и по завршувањето на домашното издание и во текот на изминатава недела дополнително ги унапредија своите решенија со поддршка на менторите. Тие се сега во трка за една од 6-те глобални награди од NASA со можност да добијат покана за посета на Kennedy Space Центарот во Флорида и да присуствуваат на полетување на ракета во текот на 2021 година.
Изминатиот викенд Скопје беше дел од најголемиот хакатон во светот, NASA Space Apps Challenge на кој земаа учество над 25.000 учесници од 200 виртуелни локации на 5 континенти.
На виртуелната церемонија за прогласување на најдобрите свое обраќање имаше Лук Захнер, канцелар за односи со јавност на Амбасадата на САД во земјава, а ексклузивно предавање за учесниците одржа Николас Скајтланд, Заемник Шеф на NASA за технолошки истражувања. За време на церемонијата им беа доделени трофеите и наградите за Прво место на членовите на тимот AtomZ составен од Матеј Милосиевски (16), Орхан Багашов (17), Андреја Поповиќ (17) и Тео Китановски (15), сите од средното училиште Јахја Кемал, за второ место на членовите на тимот EXCEL-erators составен од Јана Мајнова (18) од гимназијата Јосип Броз, Никола Лазаревски (19) и Бисера Петроска (19) од Факултетот ФИНКИ, Никола Индовски (19) од Факултетот ФЕИТ и Бојана Стефаноска (18) од Универзитет во Нова Горица. Наградата People’s Choice (избор на публиката) му припадна на тимот MySystems од Гостивар составен од членовите: Седеф Ќамили (19), Исра Азизи (18) и Мустафа Ести (19). За најдобар ментор за време на натпреварот самите учесници го избраа Александар Бојковски од компанијата Symphony Solutions.
Првопласираниот тим работеше на развивање на поиновативна верзија на алат кој веќе го користат астронаутите на Меѓународната Вселенската Станица, од причина што актуелната верзија има повеќе проблеми и досега предизвикала и оштетувања на станицата. Притоа требаше да ги земат предвид специфичните надворешни и внатрешни влијанија, како и карактеристиките на различните видови на материјали. Одлуката на глобалната жири комисија ќе биде позната околу Нова година.
Во рамките на главниот настан, по 6-ти пат се организираше и натпревар за најмладите NASA Kids & Youth Space Challenge за сите на возраст од 4 до 14 години, со можност поискусните да се натпреваруваат на таканаречени “Младински предизвици” и да влезат во конкуренција со повозрасните. Кај помладите исто така беа прогласени едно прво и едно второ место, а третото место го делеа дури 3 дечиња меѓу кои и Дејан Зафиров, 5то одделение во основното училиште Ванчо Прке од Штип, за деца со посебни потреби кој со помош на неговата учителка Светлана Трнинкова изработи маска-планета. Организаторите на најмалите им доделија и две специјални награди Young Space Brainiac и Rocketry Wizard.
Сите учесниците имаа можност да разговараат со ексклузивни говорници од NASA, JPL, Google, Blue Origin и MIT кои со нив ги споделија своите искуства и знаења. Имено, тимот на Њуменс Бизнис Акцелераторот специјално за учесниците на овогодинешниот хакатон, ги овожможи виртуелните гостувања на:
1. Nicholas Skytland, Заменик Шеф, за Технолошки Истражувања во NASA, кој работи на најновата Артемис Мисија која има за цел да го донесе следниот маж или жена на Месечината најдоцна до 2024 година
2. Max Fagin, Aerospace Systems Engineer во Blue Origin (Вселенската компанија на Jeff Bezos), Commander at the Mars Desert Research Station и еден од основачите на светски познатиот стартап Made in Space – кој изработува 3D алатки во Вселената за астронаутите кои живеат во Меѓународната Вселенска Станица
3. Kenny Vassigh, Senior Technical Program Manager во Google и Програмски и Проектен Менаџер во NASA Ames Истражувачкиот центар во период од 12 години
4. Maya Nasr, Аеrospace докторант на MIT, која работи на Mars Oxygen ISRU експеримент за NASA Jet Propulsion Lab’ Mars 2020 мисијата (најновиот Perseverance Ровер) која потекнува од Либан но успева да добие стипендија на 16 години и да замине во Америка
Овој настан секоја година привлекува се’ поголем интерес кај младите и претставува одлична можност за сите компании, училишта и универзитети да ги препознаат и поддржат младите таленти од земјата во напорите да ги развиваат своите вештини и знаења за иновативно решавање на предизвици и воедно претставува одличен начин за откривање, стипендирање и нивна рана регрутација.
Настанот е во организација на Њуменс Бизнис Акцелераторот и Фондацијата Голдилокс, а традиционално е поддржан од страна на Амбасадата на САД во Скопје.
Следете нѐ за редовни апдејти на: https://www.facebook.com/NASASpaceTechMK и https:// www.facebook.com/NewMansBA
