37.8 C
Skopje
вторник, јули 27, 2021

Јове Парговски со иновативен туристички пристап ги открива скриените места на Мариово!

Kabtel desktop

Со self-guided tours кои стануваат чудо на многу туристички пазари. Зошто? Затоа што само-водечките тури овозможуваат поголема независност и слобода во споредба со класичните тури, а од друга страна пак ви даваат чувство на сигурност во прилики кога сакате самостојно да патувате во некоја област. 
Мобилнот телефон – ваш водич низ Мариово е проектот зад кој стои Јове Парговски и тимот од RuralAdventure.mk  

Новинар – Љубица Ангелкова

Самоводечките тури стануваат чудо на многу туристички пазари. Зошто?

Само-водечките тури овозможуваат поголема независност и слобода во споредба со класичните тури, а од друга страна пак ви даваат чувство на сигурност во прилики кога сакате самостојно да патувате во некоја област. Сами избирате колку време ќе се задржите на одредена локација, која тура ќе ја изберете и едноставно кажано – истражувате во свое темпо. Потребата за ваков вид на патување постоела од секогаш, а денес технологијата ни овозможува тоа лесно да се реализира.    

Мобилнот телефон – Ваш водич низ Мариово е проектот зад кој стоите. Зошто Мариово? 

Повеќето членови на нашето здружение (OFF ROAD Macedonia) сме по потекло од Мариово и неколку години наназад во соработка со туристичките агенции организираме џип сафари екскурзии. На нашите гости секогаш се трудиме да им обезбедиме квалитетна услуга и за нивното безбедно патување се грижат нашите професионални возачи кои одлично го познаваат теренот. Проблем претставува непознавањето на странски јазици и неможноста во некои тури да учествува и туристички водич кој квалитетно би го претставил регионот.

Истиот проблем се среќава и при организацијата на пешачки и велосипедски тури, а забележавме дека и кај дел од организираните групи туристи, во некои случаи недоволно или пак неточно се презентира културното и природното богатство. Тука се и самостојните посетители, кои најчесто лутаат низ селата, без некоја конкретна траса и предлог што да посетат и без соодветни информации доколку сакаат да научат нешто повеќе за одредена дестинација.

Како здружение, сметавме дека треба да преземиме нешто во однос на овај проблем, истражувавме и од можните решенија ги избравме само-водечките тури, кои со помош на IMEпрограмата и Швајцарската агенција за развој и соработка ги направивме бесплатни и достапни за сите посетители на Мариово.

Само-водечките аудио тури се на македонски, англиски, француски, германски и знаковен јазик. Колку време работевте на проектот и кој стои позади тимот?

Проектот започна во месец септември 2020 година и завршува на крајот на овој месец со промотивен настан за туристички агенции и промотори. Зад проектот стои тим на експерти од разни области. Текстовите ги подготвија: Оливера Макриевска, Ирена Ружин, Роберт Илиевски, Слободан Стојковски, Валентин Соклевски, Марија Стојановска, Соња Димитриовска и Тренчо Димитриевски. За преводот и аудио нарациите се погрижија: Синоличка Саботковска, Емилија Вељанова, Ана Жежовска, Елена Ристевска Лутовска и Елена Захариевска Михајловски од МЕМЕХ Битола. Гимел студио, Мими Марковски и Dreamcast Bitola го презедоа делот на аудио и видео обработка, а интерпретатор на знаковен јазик е Катерина Шарковска. ГАУС Институтот од Битола беше задолжен за делот на дизајн на веб страната и поставување на материјалите на Youtube и izi.Travel.

Сакам да ја нагласам и улогата на тимот од IME програмата (Increasing Market Employability), Ѓорѓиевска Тања, Димовска Ана и Тодоровски Зоран, со кои сме во постојана комуникација и кои со своето искуство одиграа важна улога во успешноста на проектот.

Во развиениот свет каде туризмот се дефинира како совршено туристичко искуство, а не како масовен продукт кој е крајно искомерцијализиран, особено се ценат индивидуалните туристи. Од каде црпевте искуства?

Преку нашите патувања сме имале прилики да се сретниме со многу позитивни примери, а постојано пратиме и присуствуваме на разни работилници и обуки. Мариово е специфичен случај како регион со помалку од три жители на километар квадратен, кој се соочува со слаба инфраструктура во секој поглед. Тука е потребен посебен пристап, сконцентриран кон помали групи посетители, кои треба да се задржат што е можно подолго, преку понуда на квалитетни содржини. Регионот е богат со историја, културно и природно богатство, традиционални занаети и специјалитети кои се особено интересни за посетителите. 

Преку само-водечките тури, на сите оние кои сакаат да го посетат Мариово им обезбедуваме содржини за повеќедневен квалитетен престој, а тука се и комерцијалните џип сафари, велосипедски и пешачки тури, кои дополнително ја збогатуваат туристичката понуда.

Во летниот период селата живнуваат со повратници од градовите кои ги средуваат своите куќи и градини, а дел од нив, оние постарите имаат многу да понудат од аспект на традиционални занаети и специјалитети. Сметам дека воМариово може да се направи една успешна туристичка приказна.  

Што е на листата на локации од Мариово?

Моментално преку проектот сме сконцентрирани само на селата Градешница, Старавина, Будимирци и Зовиќ, во т.н битолски дел на Мариово. Дигитално се маркирани 25 локации, но исто така се изработени содржини за работи кои го прават Мариово посебно. Традиционално пчеларење, биеното сирење, мариовската носија, се само дел од тајните кои им ги откриваме на посетителите.

Овие содржини се поврзани преку 6 различни тури, од кои четири се пешачки, а две наменети за велосипед или пак теренско возило. Оставивме и опција за сите оние кои сакаат да се занимаваат со туризам во Мариово, својот бизнис бесплатно да го обележат на нашата веб страна. 

Така на пример доколку ја следите пешачката тура низ село Зовиќ, ќе дознаете дека пчеларењето е традиционална гранка во овој регион и дека денес на ова место можите да купите квалитетен Мариовски мед или пак биено сирење од некој од локалните производители, или пак да пробате некој локален специјалитет во етно куќата „Кај Мостот“

Каква е постапката за оние кои ќе одлучат да ја користат „Рурална авантура“ апликацијата?

Само-водечките тури се поставени на нашата веб страна www.RuralAdventure.mk, која има функционалност слична намобилна апликација и ве прати за време на вашето патување. Бидејќи на одредени локации во Мариово нема телефонски сигнал, се препорачува да се користи и бесплатната апликација izi.Travel, каде исто така се поставени турите и се достапни во офлајн мод. По изборот и преземањето на саканата тура, добивате мапа со траса која е ваша водилка за време на патувањето. Штом пристигните до одредена локција или точка од интерес, се активира аудио нарација на еден од четирите јазици. За време на вашето патување, апликацијата ви дава и совети за тоа на што да внимавате, каде има извор на вода, локален бизнис и слично, исто како да сте со локален водич.

Дали имате аналитика за корисниците?

Да. Од почетокот на проектот имаме јасно зацртани цели кои што сакаме да ги постигниме. Прво бевме сконцентрирани кон анализа на корисничкото искуство и подобрување на турите и содржините, а веќе се работи и на таргетирано привлекување на публика. 

Она што не радува е фактот дека на посетителите им е интересна веб страната и се задржуваат подолго на неа. Моментално имаме најмногу посетители од Македонија, по што следуваат САД, Австралија и Шведска, а имаме и првична слика кои содржини најмногу им се допаѓаат на посетителите.

Моментално околу 65% од посетителите ги добиваме преку социјалните мрежи, а согласно нашата SEО стратегија имаме таргетирано и клучни зборови, што резултира со постојан пораст на бројот на посетители кои ги добиваме преку пребарувачите.

Во рамките на проектот беа испечатени и 8000 мапи каде преку употреба на QR кодови (линкови) содржините се поврзани со веб страната, што исто така е важен извор на посетители. Од анализата на посетителите која ја добиваме преку платформата izi.Travel, веќе се направени подобрувања на дел од турите.

Колку тури сега се ставени на апликацијата

Моментално се поставени вкупно шест тури, кои може да се поминат пеш, со велосипед или теренско возило, но веќе се работи и на нови тури и содржини. Турата до Добро Поле на пример, планираме да ја изведиме во плус две полесни варијанти, а пешачката тура до манастирот Чебрен, со мала модификација планираме да ја направиме и велосипедска. Во Мариово веќе има две велосипедски тури кои се маркирани на национално ниво, а поминуваат покрај дел од нашите локации, па така нашите содржини им се достапни и на овие посетители. 

Колку пандемијата беше тригер за ваква апликација, од аспект на избегнување на масовен туризам и негрупирање?

На почетокот на пандемијата лично како туристички водич имав групи на туристи, во кои имаше откажувања поради страв од зараза. Во класичните тури, гостите се движат во група, користат заеднички превоз и тешко може да се одржува сигурно растојание. Ако се анализираат пребарувањата на интернет користиците според Google trends, ќе видиме дека во огромен пораст се пребарувањата на локации надвор од урбаните центри и гужви. Се бараат локации во природа, за природен детокс, подобрување на имунитетот, физичкото и менталното здравје.Мариово е идеално место за овие туристи, а преку нашите тури имаат и предлог содржини за нивниот престој.

Дали размислувате за надградба? Со оглед на фактот што културата на патувањата се менува во корист на ваков индивидуален и одржлив туризам.

Од месец март кога за прв пат беше јавно објавен проектот, до денес, постојано се работи на подобрување на содржините.Турите се веќе тестирани од неколку експерти од разни области, од кои добивме повратен одговор и конструктивни насоки за подобрување. Исто така се мери и посетеноста и интеракцијата на посетителите, а на крајот на месецот е планиран и промотивен настан со туристички агенции, од кои што исто така очекуваме да дадат свое мислење.   

Намерата е концептот кој го претставивме да го усовршиме што е можно подобро, а потоа да пристапиме кон надградба и проширување. Веќе се работи на нови содржини од другите делови на Мариово, а не гледам причина зошто не би се вклучиле и други области во Македонија.

Сподели!
  •  
  •  

НАЈПОПУЛАРНИ

Сподели!
  •  
  •