Претседателот на САД, Доналд Трамп, во четврток потпиша извршна наредба со која им наредува на Соединетите Американски Држави да се вратат на Месечината до 2028 година и да изградат постојана база на неа до 2030 година. Според документот, целта на оваа одлука е да се обезбеди американска супериорност во вселената, а мисијата ќе ја води НАСА.
Трамп очигледно сака да ги врати Американците на Месечината како дел од програмата „Артемис“, која ја започна неговата прва администрација уште во 2017 година.
Покрај тоа, американскиот претседател нареди САД да изградат „првите елементи на постојана лунарна база на Месечината до 2030 година, за да се обезбеди трајно присуство на Америка во вселената и да се овозможат следните чекори во истражувањето на Марс“, според извршната наредба достапна на веб-страницата на Белата куќа.
Како дел од програмата „Артемис“, Соединетите Американски Држави веќе ја завршија мисијата „Артемис I“, која претставува беспилотен лет за време на кој вселенското летало „Орион“, со помош на гравитациски маневар, беше испратено во далечна орбита околу Месечината, по што се врати на Земјата.
За следната година е планирана пилотирана мисија, за време на која екипажот треба да ја обиколи Месечината, а потоа да се врати. Последните луѓе одеа по површината на Месечината кон крајот на 1972 година, кога НАСА испрати екипаж од тројца луѓе до единствениот природен сателит на Земјата како дел од мисијата Аполо 17.
(Klix.ba)
Фото – Devian Art
