Од јануари Германија ќе воведе нова задолжителна воена служба. Иако приклучувањето кон вооружените сили е доброволно, сите 18-годишни мажи на одредена возраст мора да пополнат прашалник на Бундесверот и да се подложат на лекарски преглед. А за оние кои се обидуваат да ја избегнат обврската, работите можат да станат доста непријатни.
Германската армија – Бундесверот – користи 14 прашања за да процени кој е погоден и заинтересиран за воена служба. Младите мажи мора да ги испратат своите одговори до Бундесверот. Жените исто така имаат право на тоа. Секој што не ќе одговори на прашалникот – или ќе даде неточни одговори – и покрај повторените барања, се соочува со парична казна според Законот за административни прекршоци.
Оваа парична казна може да достигне до 1.000 евра! Точниот износ ќе се утврдува од случај до случај, во зависност од сериозноста на прекршокот, пишуваат германските медиуми.
Од јули 2027 година лекарскиот преглед ќе биде задолжителен за сите мажи. Оние кои нема да се појават ќе се соочат со последици. Министерството за одбрана објаснува: доколку регрутот не се појави на лекарски преглед без валиден изговор, од полицијата може да се побара да го приведе.
Едноставно кажано: секој што нема да се појави на лекарски преглед може да биде доведен во регрутен центар од страна на полицијата.
Првите прашалници треба да бидат испратени од средината на јануари. Во иднина писмата ќе се испраќаат неделно. Министерството за одбрана очекува Бундесверот да контактира со околу 54.000 млади луѓе секој месец.
Со новиот систем за регрутирање, министерот за одбрана Борис Писториус сака да ги модернизира вооружените сили. Се очекува Бундесверот да порасне од сегашните 183.000 војници на дури 270.000 до 2035 година, објавуваат германските медиуми.
(Kamatica)
(фото: Wikimedia)
