Еднa од најпознатите продавници за деликатеси во Барселона, Queviures Múrria, којa работи повеќе од 100 години, воведе необична мерка за да ги обесхрабри туристите кои доаѓаат само за да фотографираат, а да не купат ништо.
Посетителите кои доаѓаат „само за да разгледаат“ мора да платат 5 евра по лице. Целта е да се намалат толпите и да им се овозможи на клиентите кои навистина сакаат да купат производи да ги извршат своите купувања на мира. На вратата од продавницата е поставен знак на англиски јазик: „Посетата само за разгледување чини 5 евра по лице. Ви благодариме“.
Тони Мерино, менаџерката на продавницата, рече дека никој не ја платил таксата.
„Не сме наплатиле од никого, но тоа не е поентата. Поентата е да не се направи просторот премногу преполн со луѓе кои влегуваат само за да фотографираат“, рече Мерино.
Сопственикот на продавницата сака туристите да разберат дека просторот им служи на вистински клиенти, особено затоа што дел од продавницата функционира и како ресторан за оние кои сакаат да ручаат или вечераат на мир.
Оваа одлука дојде веднаш откако локалната самоуправа на Барселона го забрани пушењето на сите плажи со цел да се заштити животната средина и правото на граѓаните на чиста средина без чад од цигари. Слични мерки веќе се во сила во други делови на Шпанија, каде што казните за пушење на плажите можат да достигнат 2.000 евра.
Ако сепак сакате да ја избегнете „казната“ и да уживате во шпанските специјалитети, градот нуди различни алтернативи:
Меркат де ла Бокерија на популарната Ла Рамбла нуди сè: од свежо овошје и зеленчук до морска храна и локално месо.
Бодега Биариц 1881, шармантен тапас бар, кој работи само со готовина и без резервации.
Мишелин ресторани – како што е ABaC, каде што готвачот Жорди Круз подготвува ексклузивно дегустациско мени од 295 евра со иновативни јадења како што се пиња колада во стилот на рамен, октопод со зеленчук и телешко пилота цукуне во јапонски зачини.
Барселона останува кулинарска дестинација од светска класа, но со јасни пораки до туристите: дојдете, уживајте – но почитувајте ги правилата на продавниците.
(Bizlife)
(Wikimedia)
