Група од 25 американски држави, предводени од демократи, поднесоа тужба против администрацијата на американскиот претседател Доналд Трамп. Овие држави го оспоруваат неговото последно воведување царини за стоки од 60 трговски партнери, според канцеларијата на главниот обвинител на Орегон, Ден Рејфилд.
„И покрај тоа што губи на секој чекор, Трамп повторно се обидува да предизвика уште поголем хаос врз работничките семејства и домашните бизниси во Орегон. Сите ние ја плаќаме цената за овие нелегални царини, а не странските влади“, рече Рејфилд во соопштението, според Ројтерс.
Тужбата, поднесена во американскиот Суд за меѓународна трговија во Њујорк, следува по тужбата за блокирање на царините, која малите американски бизниси ја поднесоа минатиот месец. Американските држави и малите бизниси успешно ги оспорија претходните царини што Трамп ги воведе на повеќето земји низ целиот свет во својот втор мандат, но претседателот продолжи да инсистира на нови царини, и покрај низата правни пречки.
На 24 јули, администрацијата на Трамп воведе нови царини од 10 и 12,5 проценти за 60 трговски партнери, вклучувајќи ја и Европската Унија, поради обвинувањата дека не преземаат доволно мерки за да го спречат извозот на стоки произведени со принудна работа. Тарифите стапија на сила истиот ден кога истекоа претходно воведените глобални царини од десет проценти.
(B92)
Фотo – Digwatch
