Meta Platforms Inc.. објавила повеќе од 300 реклами на Instagram и Facebookl оваа година што содржат сомнителен материјал за сексуална злоупотреба на деца, според извештајот од вторникот на непрофитната организација „Проект за транспарентност на технологијата“.
Рекламите колективно достигнале до повеќе од 29.000 луѓе и обично користеле вештачка интелигенција за да прикажат мали деца како се злоставуваат, велат од TTP. Многу од нив служеле за промоција на апликации за „голотија“ со длабоки лажни содржини, кои беа предмет на претходен извештај од групата, која го следеше нивниот извор до развивачите на апликации и рекламниот партнер на Meta во Кина. TTP е истражувачка гранка на непартиската корпоративна и владина агенција за надзор Campaign for Accountability, со седиште во Вашингтон.
Неуспехот да се спречи појавувањето на таков материјал на услугите на Meta, кои ги користат милијарди луѓе низ целиот свет, доаѓа во време кога компанијата се соочува со невиден надзор за наводните штети на социјалните медиуми врз децата. Рекламите ги кршат сопствените политики на Meta што забрануваат експлоатација, злоупотреба и голотија на деца, заедно со федералните закони на САД. ТТП соопшти дека ги пријавила рекламите во Националниот центар за исчезнати и експлоатирани деца, овластен од Конгресот.
„Содржината што вклучува сексуална злоупотреба на деца е меѓу најсериозните што може да се најдат на интернет“, рече Кејти Пол, директорка на TTP. „Но, оваа содржина не се крие во темните агли на интернетот. Таа се користи во платени реклами на платформите на Meta“.
Во еден случај, TTP соопшти дека откриле реклами што користеле фотографија објавена од млада девојка на нејзиниот профил на Instagram, на која таа носела спортска униформа. Рекламата ја претворила нејзината слика во видео во кое таа е прикажана како извршува сексуален чин, наведоа од TTP. Друга реклама прикажувала девојче пред пубертетска возраст како ја соблекува маицата, придружена со текст што ветувал „мрачна“ содржина.
„Не толерираме апликации за соблекување (nudify apps) или каква било форма на експлоатација на деца, без разлика дали е реална или генерирана со вештачка интелигенција“, изјави за Bloomberg News портпаролот на Meta, Енди Стоун.
Многу од пријавените реклами веќе биле отстранети, рече тој. Оние што стојат зад таквите активности често ги менуваат тактиките за да ги заобиколат системите на Meta, а компанијата продолжува да ги зајакнува своите механизми за откривање и спроведување на правилата, додаде тој.
Во јули TTP објави дека Meta прикажувала илјадници сексуално сугестивни реклами за апликации за дигитално соблекување, кои се дизајнирани дигитално да ја отстранат облеката или да вметнат фотографии од вистински луѓе во експлицитни слики или видеа. Новите наоди се однесуваат на реклами што се со поексплицитна содржина, велат од TTP.
До 1 септември Meta отстранила околу половина од спорните реклами од својата библиотека за реклами, соопшти TTP. Компанијата ги отстранила преостанатите реклами откако TTP ги споделила своите наоди.
Таквата содржина често се нарекува детска порнографија, но органите на прогонот и експертите ја нарекуваат и материјал за сексуална злоупотреба на деца (CSAM), бидејќи претставува доказ за кривично дело извршено без согласност.
Извештајот на TTP доаѓа кратко откако Meta се согласи на значајна спогодба за исплата на сума до 18 милијарди долари за решавање на тужбите од американските сојузни држави во врска со наводните штети што нејзините апликации им ги нанеле на младите луѓе. Австралија и повеќе од дваесетина други земји воведуваат или разгледуваат забрани за пристап до социјалните мрежи, како што е Instagram, за лица помлади од 16 години. Владата на Обединетото Кралство во вторникот објави дека ќе наложи компаниите Apple Inc. и Google (дел од Alphabet Inc.) — одговорни за оперативните системи iPhone и Android — да ги спречат децата да снимаат, споделуваат или гледаат голи фотографии на своите телефони и таблети.
Покрај Meta, органите на прогонот во САД се соочуваат со тешкотии во справувањето со ширењето на експлицитни слики и видеа изменети со вештачка интелигенција, главно поради алатките што го олеснуваат креирањето на незаконска содржина.
332-те реклами, според TTP допреле до луѓе кои можеби прелистувале содржини на Instagram и Facebook во Европската Унија, Обединетото Кралство, САД, Индија и Австралија. Некои од поединечните огласи допреле до само неколку корисници, други до стотици, а два од нив допреа до повеќе од 2.500 корисници само во ЕУ.
(Yahoo Finance)
