Според извештаите, Хуанг имал романтична врска со Кинезинката Алис Хуанг, за која се тврди дека била регрутирана да шпионира за кинеското Министерство за државна безбедност
Американската технолошка компанија „Енвидија“ отвори независна истрага по извештаите дека нејзиниот основач и извршен директор Џенсен Хуанг бил цел на странска разузнавачка операција. Случајот предизвика загриженост во индустријата за вештачка интелигенција, додека Кина ги отфрли обвинувањата за шпионажа како неосновани, пренесува Гардијан.
Според извештаите, Хуанг имал романтична врска со Кинезинката Алис Хуанг, за која се тврди дека била регрутирана да шпионира за кинеското Министерство за државна безбедност.
Во неделата, „Енвидија“ соопшти дека започнува независна истрага по објавените информации дека нејзиниот основач и директор бил цел на „странска разузнавачка операција“.
Одборот на директори на компанијата соопшти дека во овој момент нема причина да верува дека биле загрозени американската национална безбедност или тајните на Nvidia, но дека истрагата ќе ги испита сите достапни информации. Хуанг ја поддржал проверката и се обврзал да соработува со истражителите. Во нацрт-порака до вработените, Хуанг признал дека бил неверен кон сопругата и се извинил за своите постапки.
„Им должам извинување на моето семејство и на сите вас. Бев неверен кон мојата сопруга. Моите постапки ја повредија неа и нашите деца. Нема оправдување за тоа што го направив. Длабоко жалам“, напишал Хуанг.
Тој додал дека останува целосно посветен на „Енвидија“ и дека ќе работи за повторно да ја стекне довербата на вработените.
Алис Хуанг работела за компанијата Megaspeed, со седиште во Сингапур, која се занимава со центри за податоци. Компанијата е под сомнеж дека посредувала во испраќањето чипови на Nvidia во Кина и ги заобиколувала ограничувањата за извоз.
Хуанг претходно ги критикуваше американските ограничувања за извоз на чипови со вештачка интелигенција во Кина. Во мај 2025 година, тој изјави дека контролите, чија цел е да го ограничат пристапот на Кина до напредните чипови, биле неуспешни и само ја поттикнале земјата да развива сопствени алтернативи. Случајот се отвора во период кога Вашингтон е загрижен дека САД би можеле да ја загубат трката со Кина во областа на вештачката интелигенција.
Кина ги отфрли тврдењата дека шпионирала преку односот со директорот на Nvidia, оценувајќи ги како неосновани.
„Веќе одговоривме на ова прашање. Приказната за наводниот кинески шпион е целосно неосновано оцрнување и клеветење“, изјави портпаролот на кинеското Министерство за надворешни работи, Гуо Ѓиакун, на редовен брифинг, пренесува „Асошиејтед прес“.
Кинескиот државен весник „Глобал тајмс“ исто така негираше каква било поврзаност на Пекинг со вонбрачната врска на Хуанг. Весникот ги обвини американските медиуми, особено „Њујорк тајмс“, дека објавуваат шпекулации и измислена приказна за шпионажа, предупредувајќи дека случајот може да ги наруши односите меѓу двете земји.
Случајот предизвика дополнителна неизвесност на финансиските пазари, во период кога акциите на технолошките компании поврзани со вештачката интелигенција почнаа да закрепнуваат по минатонеделниот пад.
Акциите на „Енвидија“ се очекува да паднат при отворањето на американските берзи. Според податоците од платформите што овозможуваат тргување за време на викендот, нивната вредност веќе беше пониска за околу 3,5 отсто.
Во меѓувреме, азиските пазари закрепнуваа. Акциите на тајванската TSMC, најголемиот производител на чипови по нарачка во светот, пораснаа за околу 4,7 отсто. Напредок забележаа и јужнокорејските производители Samsung и SK Hynix, кои се важни добавувачи за Nvidia.
TSMC ги произведува напредните процесори на Nvidia за вештачка интелигенција, додека SK Hynix обезбедува меморија со голем пропусен опсег, неопходна за нивното функционирање.
Сузана Стритер, главен инвестициски стратег во Wealth Club, оцени дека случајот може да предизвика нова нестабилност во технолошкиот сектор, но дека би било тешко да се замени Хуанг на чело на една од највредните компании во САД.
Според неа, неговата позиција е тесно поврзана со вредноста на Nvidia и нејзината доминација на пазарот на полупроводници. Таа смета дека, засега, последиците за пошироката индустрија за чипови се релативно ограничени, иако случајот може да го попречи закрепнувањето на технолошките акции.
Крис Бошам, главен пазарен аналитичар во IG, предупреди дека новите информации би можеле да го нарушат растот на технолошките акции, особено по неодамнешните падови на пазарите.
Економистот Мохамед ел-Еријан, поранешен извршен директор на инвестициската компанија Pimco, посочи дека случајот има повеќе аспекти, вклучувајќи ја важноста на Nvidia за технолошката индустрија, пазарите и економијата, како и прашањата поврзани со раководењето на компанијата и националната безбедност.
Американскиот претседател Доналд Трамп изјави дека не разговарал со Хуанг за обвинувањата, но го опиша како добар човек.
„Не сум разговарал со него за тоа. Само знам дека е добар човек, но никогаш не знаете што се случува. Се надевам дека сè е во ред. Мислам дека е чесен човек“, изјави Трамп.
Поддршка за Хуанг изрази и милијардерот Бил Акман, извршен директор на инвестициската компанија Pershing Square. Тој на социјалната мрежа X напиша дека се надева оти станува збор само за вонбрачна врска, а не за ризик за националната безбедност.
Акман додаде дека не смета оти Хуанг треба да биде ослободен од одговорност, но изрази надеж дека последиците ќе бидат минимални.
Директорот на Tesla, Илон Маск, исто така реагираше на објава во која беше оценето дека постапките на Хуанг биле неодговорни и лоши за САД, но дека тој е незаменлив за американското лидерство во областа на вештачката интелигенција.
Случајот доаѓа во чувствителен момент за Nvidia, која е една од клучните компании во глобалниот бум на вештачката интелигенција. Нејзините чипови се користат за развој и работа на напредни системи за вештачка интелигенција, а евентуалните последици од истрагата би можеле да влијаат и врз пошироката индустрија за полупроводници.
Фото – Masaru Kamikura, CC BY 2.0, via Wikimedia Commons
