Владата на Нов Зеланд веќе нема да издава дозволи за бушење и пребарување на нафта и гас на своите територии, мерка која беше позитивно дочекана од групите за екологија и заштита на околината и оценета како историска победа во борбата против климатските промени.
Како што пишува The Guardian, забраната се однесува на сите барања за бушење кои ќе бидат доставени во иднина, но не и на постоечките 22 кои моментално се во сила.
Премиерката Јацинда Ардерн изјавила дека Владата планира да ја интензивира транзицијата кон иднина која ќе биде јаглеродно неутрална и очекува оваа транзиција да се случува во следниве три децении.
„Транзицијата мора да започне од некаде и доколку не почнеме да носиме одлуки во сегашноста, тогаш никогаш нема да дочекаме промени бидејќи ризикуваме да почнеме со делување кога ќе биде предоцна.“, додала таа.
Оваа Влада на Нов Зеланд е израна минатата година и едно од најголемите ветувања на истата е дека ќе се бори поинтензивно против климатските промени со тоа што ќе ги адаптира еколошките политики, ќе придонесе кон 100% електрична енергија од обновливи извори до 2035 година и ќе ја направи економијата јаглеродно неутрална до 2050 година.
Минатиот месец, премиерката Ардерн ја примила петицијата од Greenpeace New Zealand која содржела преку 50 000 потписи против бушењето за нафта и гас во државата.
