Германија моментално е на лидерската позиција според иновативноста, а сето тоа благодарение на брзината со која развива нови технологии за автономните автомобили. Според последниот извештај за конкурентност на Светскиот економски форум, Германија е најиновативна економија во светот со оценка 87,5 од вкупно 100.
Земјата ја надмина САД, која е најконкурентната економија во светот. САД сега е на второ место според иновативност со оценка 86,5, а Швајцарија ја зазема третата позиција со оценка 82,1. Според новиот индекс, брзината со која земјите прифаќаат нови идеи, методи и производи ќе им даде конкуретнтна предност во Четвртата индустриска револуција.
Според најновиот извештај на Светскиот економски форум, повеќе не е доволно да се користат само традиционални начини на раст и приходи, да се биде ефикасен и да се кратат трошоците. Наместо тоа, земјите кои најбрзо преминуваат од генерирање идеи до комерцијализација на нови производи во еден плоден екосистем на иновации ќе бидат и најпродуктивни.
Иновативниот екосистем, се мери според пет подстолбови: Комерцијализација, Интеракција и диверзитет, Административни потреби, Истражување и развој и Претприемничка култура. Но, и други фактори од типот на усвојувањето на ИКТ, квалитетот на образованието и интензитетот на конкуренцијата влијаат на способноста на една земја да иновира.
Генерално, побогатите земји имаат подобри оценки во сите столбови затоа што имаат поразвиени иновативни екосистеми. Супериноваторите Германија и САД се издвојуваат од останатите иноватори како Кореја и Јапонија како „помеки“ двигатели на иновациите, но ниедна земја не е совршен иноватор и има уште предизвици кои треба да се совладаат за да се искористат можностите кои ги носи Четвртата индустриска револуција.
Лидерската позиција на Германија се должи првенствено на бројот на идеи кои ги генерира, од кои најголем дел се за автомобилската индустрија. Компаниите таму постојано се потткинуваат да иновираат, а иноваторите имаат поддршка од бизнис секторот за да ги донесат своите производи на пазарот. За да го постигне тоа, Германија троши 2,9% од БДП на истражување и развој. Додека некои влади поради глобалната криза ги скратија трошоците за истражување и развој, Германија ги зголеми финансиите за малите и средните компании и за проектите за е-мобилност.
Оваа посветеност на истражување и развој значи дека германските производители на автомобили сега ја кројат иднината. Во 2017 година во Германија биле поднесени 2.633 патенти за беспилотни автомобили.
