Деновиве се случи една од најголемите аквизиции во Македонија во поново време. Групацијата АРИКОМА, која е дел од чешката Групација ККЦГ (KKCG) на Карел Комарек, ја купи „Сеавус“, домашна компанија за развој на софтвер и консалтинг. Со оваа аквизиција, АРИКОМА ја зајакнува меѓународна позиција во ИТ-индустријата. Зошто се случи оваа аквизција на една од најуспешните македонски компании од ИТ сферата која успешно работи во над 15 претставништва и има 800 вработени, деновиве од прва рака во интервју за А1он објасни Игор Лештар, основачот на Сеавус.
„Сеавус достигна степен на развој кој треба уште повеќе да се надградува за поголема интернационална експанзија. За тоа му е потребно окрупнување и му е потребен еден многу посилен финансиски партнер кој може да го однесе Сеавус на следното, повисоко ниво на развој. Одлуката за продажба е бизнис одлука која се темели на сериозни анализи. Продажбата отвора нови перспективи за Сеавус, за вработените, за новиот сопственик Арикома групата на компании, што за Сеавус ќе значи понатамошен напредок“.
Она што најмногу ја интересира јавноста е прашањето што по продажбата на Сеавус?
Лештар објаснува дека со влегувањето на Сеивус во една голема групација ќе се зацврстат сите постоечки операции и
деловни единици, а компанијата ќе влезе на уште повисоко финансиско и пазарно ниво. Секако,
со силен фокус на луѓето како најважна сила на развојот.
“Луѓето секогаш биле и натаму остануваат највредниот ресурс на компанијата и бизнисот. Токму затоа, на постојните 800 вработени, планирани се и нови вработувања со тенденција тој број да достигне до 2500-3000 луѓе. Како и досега, ќе продолжиме да вложуваме во обуки и професионална надградба на вработените, со цел и натаму да бидеме компанија во која работат вистински експерти од различни области на ИКТ индустријата. Секогаш верував дека вработените се клучни за успехот, а за тоа е свесен и нашиот партнер кој токму во вработените ја гледа и вредноста и силата на компанијата“, најавува тој.
Денеска Сеавус е успешна компанија која вработува 800 ИТ-специјалисти ширум светот, со петнаесет оперативни канцеларии лоцирани во неколку земји, вклучувајќи ги Шведска, САД, Македонија, Белорусија, Молдавија, Швајцарија, Србија, Босна и Херцеговина. Компанијата нуди широк спектар на софтверски производи, решенија и услуги, а во портфолиото на Сеавус се вбројуваат над 4.000 клиенти
Патот на Сеавус од 1999 година е граден со многу труд, откажувања и ризикувања, кои всушност се основата на секоја претприемничка приказна. Токму затоа, силната порака од Лештар до младите е:
„Способоноста да се преземе ризик, лична одговорност и истрајност се клучни одлики на секој добар претприемач. Во последните години мојата примарна работа е практично развој на нови бизиниси и инвестиција во компании. Постојано се сретнувам со млади претприемачи кои ми ги презентираат своите идеи и бизниси. Она што го забележувам како тренд кај нив е дека се премногу ориентирани кон обезбедување на финансии за своите бизнис идеи, наместо да се повеќе фокусирани на развој на идејата, планирањето и реализацијата како и превземање на ризикот. Како на некој начин да сакаат да направат бизнис без никаков ризик да загубат, а тоа е практично основната вредност и особина на добриот претприемач – да биде подготвен да ризикува и загуби и да научи од грешките. Процесот на падови и исправање на нозе го гради вистинскиот претприемач, тоа е духот на претприемништвото и мојата порака кон сите млади е да го изодат тој пат. Да не се трудат да започнат бизнис со нула ризик, бидејќи ризикот е тој кој нè тера да се будиме и легнуваме со мислата како утре да бидам подобар, како да го подобрам мојот производ или услуга, како да ја зголемам продажбата. На тој начин се градат лидери“.
