Инвестициската компанија „Афинити партнерс“, основана од Џаред Кушнер, зет на Доналд Трамп, и емиратскиот милијардер Мохамед Алабар заеднички ќе градат луксузен хотел и станбен комплекс во Белград, на местото на Министерството за одбрана на поранешна Југославија, пренесува Блумберг.
Како што се наведува, Трамп размислувал за слична идеја и пред да се кандидира за претседател на САД во 2016 година. Комплексот ќе се вика „Трамп“ и ќе содржи луксузен хотел и апартмани.
Кушнер разговараше со неколку брендови пред да се реши за името „Трамп“. Во текот на изминатата година разговаравме со неколку брендови за хотелот, изјави Кушнер во интервју за Блумберг.
Како што е наведено, проектот во Србија претставува прв заеднички бизнис потфат на Кушнер и Алабар. Кушнер изрази надеж дека ова е само прв од заедничките проекти што ќе се реализираат во иднина. Одлуката за брендирањето на проектот „Трамп“ е донесена по победата на Доналд Трамп на изборите во ноември, со што се зацврсти глобалниот бренд на семејството Трамп.
Се очекува луксузниот комплекс да придонесе за развојот на Белград и да го привлече вниманието на големите инвеститори и туристи.
(Seebiz.eu)
Фото – Flickr
