Договорот за воведување на летачки такси за ЕКСПО 2027 во Белград со компанијата Арчер е финализиран, потврди од Давос српскиот претседател Александар Вучиќ. Министерот за финансии Синиша Мали и главниот комерцијален директор на Арчер Авиејшн Никил Гоел потпишаа во Давос, во присуство на претседателот на Србија Александар Вучиќ и основачот и извршен директор на Арчер Авиејшн Адам Голдштајн, Договорот за партнерство што ќе биде рамка за соработка меѓу Владата на Србија и оваа компанија во воведувањето на услуги за електрично воздушно такси во Србија.
Во согласност со Договорот, Србија го избра „Арчер“ за свој префериран eVTOL партнер и има можност за купување на почетната флота авиони од типот „Midnight Flight“. Основачот и извршен директор на „Арчер Авиејшн“, Адам Голдштајн, оцени дека ова е важен ден за „Арчер Авиејшн“.
„Исклучително сме задоволни што соработуваме со Србија со цел да донесеме нови технологии. Важно е да се најдат земји и партнери со многу силни перспективи и визија за позитивна иднина што носи позитивни промени. Ова ќе биде повеќедецениско, се надеваме мултицентрично партнерство на кое работиме за да ја подобриме иднината на патувањето и авијацијата“, рече Голдштајн.
„Со ова, „Арчер“ формално стана избран партнер на Србија за воздушни такси и официјален партнер за воздушни такси за Експо 2027, што ќе се одржи од мај до август 2027 година во Белград“, рече Мали во Давос. Тој истакна дека е горд на моментот кога Србија е прва во регионот што го носи транспортот од идната генерација, што ќе ги демонстрира предностите на напредната воздушна мобилност на глобалната публика што ќе присуствува на настанот.
„Ова е одлична вест за Србија, која во 2027 година ќе му го покаже на целиот свет своето неверојатно преродување од банкротирана земја во земја со инвестициски кредитен рејтинг ориентиран кон технологии, дигитализација и понатамошен напредок“, рече Мали.
(Б92)
Фото – web site Archer.com
