Во услови на растечки трошоци за енергија и сè поизразени климатски предизвици, Штедилница Можности, во партнерство со УНДП и ИОМ, нуди иновативен зелен финансиски инструмент кој им овозможува на домаќинствата пристапно финансирање за инвестиции во енергетска ефикасност и обновливи извори на енергија, со поврат на средства од 30 проценти.
Зелениот кредит е дел од програмата „Зелен финансиски инструмент за подобрување на квалитетот на воздухот и борба против климатските промени во Северна Македонија“, која се реализира во рамки на Заедничкиот фонд за Целите за одржлив развој (SDG), во соработка со агенциите на Обединетите на нации – УНДП и ИОМ, како и други меѓународни и локални партнери. Целта на програмата е да поттикне инвестиции во одржливи енергетски решенија и да овозможи пристап до зелено финансирање за недоволно опслужените категории на населението.
Преку овој наменски потрошувачки кредит, граѓаните можат да финансираат различни зелени решенија, како што се термичка изолација, енергетски ефикасни прозорци и врати, топлински пумпи, соларни колектори и фотоволтаични системи, печки и котли на пелети, енергетски ефикасни апарати, како и електрични и хибридни возила за домаќинства со лица со попреченост.
Кредитот се одобрува со поволни услови, фиксна каматна стапка и без потреба од жиранти до одреден износ, а средствата се исплаќаат директно на добавувачите, со што се обезбедува наменско и транспарентно користење. Дополнителна придобивка е грантот од 30%, кој корисниците го добиваат по реализација и валидација на инвестицијата од независен проценител.
Зелениот кредит е наменет за вработени лица, пензионери, земјоделци и сопственици на мали бизниси, со посебен фокус на социјално и економски ранливи категории, вклучувајќи самохрани родители, жени како главни носители на приход, домаќинства со лица со попреченост, млади лица, ромски домаќинства и семејства со повеќе деца.
Со ова решение, Штедилница Можности не само што им помага на граѓаните да ги намалат трошоците за енергија, туку и директно придонесува кон подобрување на квалитетот на воздухот, намалување на емисиите на штетни гасови и забрзување на зелената транзиција во земјава.
Со воведувањето на Зелениот кредит, Штедилница Можности поставува нов стандард во одржливото финансирање, комбинирајќи економска исплатливост, социјална инклузија и позитивно влијание врз животната средина.
