OpenAI разгледува договор за распоредување на својата вештачка интелигенција на „некласифицирани“ мрежи на НАТО, потврди извор запознаен со разговорите во вторник, само неколку дена откако сопственикот на ChatGPT постигна договор со Пентагон.
Волстрит џурнал првично објави дека OpenAI разгледува договор со НАТО. Според весникот, извршниот директор на OpenAI, Сем Алтман, првично рекол на интерен состанок дека компанијата размислува за примена на технологијата на сите класифицирани мрежи на НАТО, но подоцна изјавата на Алтман била корегирана, бидејќи потенцијалниот договор се однесува само на некласифицираните мрежи на Алијансата, објавува Ројтерс.
OpenAI, поддржан од инвеститори како што се Microsoft и Amazon, минатата недела објави дека постигнал договор за распоредување на својата технологија во класифицираната мрежа на Пентагон, откако американскиот претседател Доналд Трамп ѝ нареди на владата да ја прекине соработката со конкурентската компанија Anthropic.
Отстранувањето на Anthropic следеше по застојот во преговорите со Пентагон за тоа како да се користи нивната технологија. Извршниот директор на Anthropic, Дарио Амодеј, го нагласи противењето на компанијата на користењето на нивните модели на вештачка интелигенција за масовен домашен надзор или целосно автономно оружје.
Пентагон претходно изјави дека нема намера да користи вештачка интелигенција за масовен надзор на американски граѓани или да развива оружје што работи без човечки надзор, но дека сака да овозможи каква било законска употреба на технологијата на вештачка интелигенција.
Во ажурирана изјава објавена во понеделник, по потпишувањето на договорот во петок, OpenAI изјави дека неговите системи „не смеат намерно да се користат за домашен надзор на американски граѓани“ и дека Пентагон потврди дека услугите на вештачка интелигенција нема да ги користат разузнавачките агенции како што е Националната агенција за безбедност (NSA).
На интерен состанок, Алтман оцени дека договорот со Пентагон е „тешка, но правилна одлука“, иако донесе негативни последици за угледот и односите со јавноста на компанијата на краток рок. НАТО сè уште не ги коментираше наводите за соработка со Open AI.
(Бизнис.рс)
Фото – Heute.at
