Кинеските власти побараа од своите главни рафинерии да престанат да извезуваат дизел и бензин, бидејќи војната на Блискиот Исток претставува ризик од недостиг на снабдување, објави американската агенција Блумберг. Тековната блокада на поморскиот сообраќај во стратешки важниот Ормузски теснец, помеѓу Индискиот Океан и Персискиот Залив, го загрозува снабдувањето со енергија на азискиот гигант, кој е во голема мера зависен од суровата нафта од овој регион.
Службеници од Националната комисија за развој и реформи (NDRC), главното тело за економско планирање на Кина, се сретнаа со претставници на рафинериите и „усно побараа привремено суспендирање на испораките на нафтени производи, кое ќе стапи на сила веднаш“, според Блумберг.
„Од рафинериите е побарано да престанат да потпишуваат нови договори и да преговараат за откажување на веќе договорените испораки“, објави агенцијата, повикувајќи се на извори блиски до ова прашање. ПетроКина, Синопек, ЦНООК, Синокем Груп и приватната рафинерија Жеџијанг Петрохемикал редовно добиваат квоти за извоз на гориво од владата, додаде Блумберг.
Фото – Peak-px
