Уште еднаш, кризата во светот ќе го попречи закрепнувањето на германската економија – војната во Иран ги загреа цените на енергетските производи, и поради ова, водечките економски институти барем ја преполовија прогнозата за раст за 2026 година.
Наместо раст на бруто домашниот производ од 1,3 проценти, како што очекуваа во септември, петте највлијателни институти сега заеднички прогнозираат само 0,6 проценти, пренесува ДПА.
Германија тесно избегна трета година по ред рецесија во 2025 година и се надеваше на позначаен раст оваа година, бидејќи владата вети дека ќе обезбеди масовни инвестиции во инфраструктурата, одбраната и климатската транзиција.
Нападот на САД и Израел врз Иран, сепак, веќе предизвика последици чии размери го задушија оптимизмот на Берлин дека инвестициите оваа година ќе стимулираат позначаен економски пресврт.
„Шокот на цените на енергијата силно ја потиснува економијата, а во исто време експанзивната фискална политика ја поддржува домашната економија и спречува понатамошен пад“, рече економистот на Ифо, Тимо Волмерсхаузер.
Минхенскиот Ифо, Германскиот институт за економски истражувања, Килскиот институт за светска економија, Институтот Лајбниц за економски истражувања и Хале Институтот за економски истражувања објавуваат заедничка економска прогноза двапати годишно.
Покрај намалувањето на проценката за раст за оваа година за повеќе од половина, институтите сега се попесимистички настроени во нивната прогноза за економијата во 2027 година. Наместо раст од 1,4 проценти, тие сега очекуваат половина процентен поен помалку.
Една од очекуваните последици од војната и зголемувањето на цените на нафтата и гасот е забрзувањето на инфлацијата на 2,8 проценти оваа година и 2,9 проценти следната година.
(Biznis.rs)
Фото – Wikimedia
