Меѓународниот монетарен фонд (ММФ) денес ја намали прогнозата за економскиот раст на Еврозоната на 1,1 процент во 2026 година, што е за 0,2 проценти помалку отколку во јануарскиот извештај. Во исто време, прогнозира мало забрзување на 1,2 проценти во 2027 година, што е исто така за 0,2 проценти помалку од претходната проценка.
Според оваа прогноза, за Германија се очекува економски раст од 0,8 проценти во 2026 година и 1,2 проценти во 2027 година, во двата случаи за 0,3 проценти помалку отколку во претходната проекција. Франција, втората најголема економија во Еврозоната, ќе забележи економски раст од 0,9 проценти во обете години, при што прогнозата за оваа година е намалена за 0,1 процент, а за следната за 0,3 проценти. Велика Британија, според ММФ, може да очекува раст од 0,8 проценти во 2026 година и 1,3 проценти во 2027 година, при што прогнозата за оваа година е ревидирана надолу за дури 0,5 проценти, а за 2027 година за 0,2 проценти.
Кина забележува поблаго влошување на изгледите, со очекуван раст од 4,4 проценти во 2026 година, малку под претходната проценка од 4,5 проценти и четири проценти во 2027 година. ММФ наведува дека државните стимулативни мерки на Пекинг делумно ги ублажуваат негативните ефекти од надворешниот шок.
Соединетите Американски Држави можат да очекуваат раст од 2,3 проценти во 2026 година и 2,1 процент во 2027 година.
Според проценката на Фондот, Индија ќе забележи раст од 6,5 проценти оваа и следната година, а прогнозата е малку зголемена за 0,1 процент во двата случаи. Најголем пад се очекува во регионот на Блискиот Исток и Централна Азија, каде што се очекува растот да забави на 1,9 проценти во 2026 година, од 3,6 проценти минатата година.
Одредени земји во регионот веќе влегуваат во контракција, вклучувајќи ги Бахреин, Ирак, Кувајт и Катар, додава ММФ.
Главниот економист на Фондот, Пјер-Оливие Гуринса, оцени дека конфликтот на Блискиот Исток „го запре моментумот на раст“ и нагласи дека конечните ефекти ќе зависат од времетраењето и интензитетот на конфликтот. Тој посочи дека клучен фактор ќе биде брзината на нормализација на производството и транспортот на енергија по завршувањето на конфликтот, што директно влијае на глобалните цени и економските текови.
(B92)
Foto – Picryl
