Во Јапонија расте град како никој друг. Под планината Фуџи, Toyota го развива Woven City, експериментална населба која служи како тест-полигон за роботика, вештачка интелигенција и автономен транспорт со нулта емисија во услови на реалниот свет.
Името Woven City е знак за корените на Toyota, која некогаш започна како производител на текстилни разбои, но сега ја ткае иднината на мобилноста.
Целта на проектот не е само да се градат паметни автомобили, туку да се создаде систем каде што машините и луѓето соработуваат.
„Woven City се стреми да ја интегрира мобилноста во самата инфраструктура на општеството. Со поврзување на податоците за движење на пешаците со возилата, имаме за цел да создадеме побезбедно општество, не само за оние во автомобили, туку и за сите учесници во сообраќајот“, рече Даисуке Тојода, потпретседател на Woven by Toyota.
Првата фаза, која опфаќа околу 47.000 квадратни метри, сега е завршена, а првите 100 жители, кои се нарекуваат „ткајачи“, веќе се вселиле. Кога проектот ќе биде завршен, градот ќе зафаќа речиси 300.000 квадратни метри и ќе биде дом на околу 2.000 луѓе.
Жителите не се само обични жители, тие се во улога на „тест возачи“ на секојдневниот живот. Тие комуницираат со прототипни домашни роботи, користат автономна логистика што работи низ подземни тунели, додека над земјата се тестираат безбедносни системи базирани на вештачка интелигенција и симулации на летачки такси.
Еден од најголемите проблеми за автономните системи во Јапонија (и во светот) се строгите закони и недостатокот на докази од реалниот свет. Woven City го решава овој проблем со обезбедување контролирана, но реална средина.
„Тука можеме да испробаме разни работи и да докажеме дека се безбедни и изводливи. Врз основа на тие докази, можеме да им помогнеме на владите да ги подобрат регулативите“, истакнува Тојода.
Кога целосно ќе биде завршен, се проценува дека овој проект ќе ја чини Toyota околу 10 милијарди долари.
Тоа е цената што гигантот е подготвен да ја плати за да стане лидер во новата ера во која автомобилот повеќе не е само средство за транспорт, туку дел од дигитална мрежа што се грижи за безбедноста на пешаците и ефикасноста на градот.
(AI Weekly/Bizlife)
(фото: Toyota Woven City)
