Европската климатска опсерваторија Коперник предупреди дека глобалните океани се приближуваат кон рекордни температури и дека нови максимуми би можеле да бидат забележани веќе во мај.
Според месечниот извештај, просечните температури на површината на морето (со исклучок на поларните региони) во април оваа година биле блиску до историските максимуми од претходната година, со интензивни морски топлотни бранови во неколку региони, вклучувајќи го централниот Пацифик и западниот брег на Северна и Јужна Америка.
Експертите изјавија дека ситуацијата се одвива во контекст на враќањето на климатскиот феномен Ел Нињо, кој влијае на глобалните временски модели, вклучувајќи ги температурите, ветровите и врнежите.
Метеоролошките служби предупредуваат дека постои зголемена веројатност за негов развој во периодот од мај до јули, додека во исто време спротивниот феномен, Ла Нињa, слабее. Ел Нињо е природен климатски феномен, но научниците истакнуваат дека неговите ефекти се интензивираат денес поради долгорочното глобално затоплување предизвикано од емисиите на стакленички гасови.
Климатските експерти предвидуваат дека следниот Ел Нињо би можел да биде особено интензивен, со потенцијал да ги сруши температурните рекорди во наредните години.
Експертите, исто така, предупредуваат на сè почести екстремни временски настани, вклучувајќи поплави, суши и тропски циклони низ целиот свет.
Во извештајот, исто така, се забележува дека април бил третиот најтопол април досега, додека се очекува Европа да доживее лето со температури над просекот и зголемен ризик од суша и пожари.
(N1)
(фото: Picryl)
