Јапонскиот автомобилски гигант Honda објави загуба од 2,7 милијарди долари за годината што заврши во март, што е прв таков пад откако компанијата стана јавна во 1957 година.
Главната причина е скапото повлекување од своите амбициозни планови за електрични автомобили. Компанијата објави повеќе од 9 милијарди долари во отписи и трошоци за реструктурирање откако стана јасно дека клиентите не се префрлаат на електрични возила со темпото што го очекуваа производителите.
Honda инвестираше милијарди во развој на нови електрични модели во последниве години, со цел сите нејзини возила да бидат електрични или на водороден погон до 2040 година. Стратегијата имаше за цел да го позиционира јапонскиот производител пред конкурентите како што е Toyota, која продолжи да се потпира на хибриди и мотори со внатрешно согорување. Сепак, по почетниот бран интерес, поширокиот пазар остана воздржан.
Купувачите бегаат од високите цени на електричните автомобили, неразвиената мрежа за полнење и намалувањето на владините субвенции во САД, најважниот пазар на Honda.
Според медиумските извештаи, продажбата на електрични возила во САД ќе се намали за околу четири проценти во 2025 година. Затоа, Honda се откажа од три главни електрични модели наменети за Северна Америка, додека поевтината серија развиена со General Motors и високотехнолошкиот автомобил со Sony се ставени на чекање.
Проблемите на Honda не се изолиран случај. Други големи производители на автомобили, од европскиот Stelantis до американскиот Ford, исто така бележат милијарди загуби од електрични програми, што покажува дека зелената транзиција во автомобилската индустрија сè повеќе личи на скапо отрезнување по години големи ветувања.
(Kamatica)
