NOKIA повеќе не произведува телефони, но сепак заработува милијарди – главно од работи што повеќето луѓе никогаш не ги гледаат. Некогаш неоспорен крал на мобилните телефони, денес е една од клучните компании што „зад сцената“ ја одржува глобалната комуникациска инфраструктура.
Финската компанија NOKIA денес генерира најголем дел од своите приходи преку мрежна инфраструктура за телекомуникациски оператори, но и преку огромно портфолио на патенти што ги користат практично сите главни играчи во комуникациската индустрија.
За многумина NOKIA е синоним за легендарните телефони од 2000-тите – од 3310 до првите деловни телефони. Сепак, компанијата ја изгуби битката на пазарот на паметни телефони кога се појавија уредите на Apple и Android.
Откако го продаде својот мобилен бизнис на Microsoft во 2014 година, NOKIA се впушти во целосна трансформација. Го префрли својот фокус на телекомуникациска опрема, 5G мрежи, cloud инфраструктура и патенти.
Денес, NOKIA е еден од најголемите светски добавувачи на опрема за мобилни мрежи, заедно со компании како Ericson и Huawei.
Како всушност NOKIA заработува пари? Компанијата денес работи преку неколку главни сегменти: мрежна инфраструктура за оператори, 5G технологии, облачни и центри за податоци, приватни индустриски мрежи и, можеби најпрофитабилно од сите – лиценцирање на патенти.
NOKIA поседува десетици илјади патенти поврзани со мобилни комуникации, Wi-Fi, видео технологии и 5G стандарди. Секој пат кога производителите на телефони, компјутери или други поврзани уреди користат одредени комуникациски стандарди, тие често мора да платат лиценца на NOKIA.
Ова значи дека дури и компаниите што директно се натпреваруваат со NOKIA ја користат нејзината технологија.
Токму бизнисот со патенти стана еден од најстабилните извори на приход на компанијата. NOKIA заработува милијарди евра годишно преку лиценцирани договори со технолошки гиганти ширум светот.Компанијата заработува пари од практично секој современ телефон што користи 4G или 5G технологија – дури и кога нејзиното лого не се гледа никаде.
Тоа е модел кој сè повеќе наликува на технолошки компании кои не мора да продаваат финален производ, туку интелектуална сопственост што ја движи целата индустрија.
NOKIA сега се обидува да фати нов бран на технологија – фузија на вештачка интелигенција и телекомуникациски мрежи.
Компанијата се позиционира на пазарот за таканаречени AI-RAN системи (мрежи на радио пристап што користат вештачка интелигенција за оптимизирање на работењето). Аналитичката фирма Omdia проценува дека овој пазар би можел да вреди повеќе од 200 милијарди долари кумулативно до 2030 година.
Идејата е мрежите да се направат попаметни, поавтоматизирани и енергетски поефикасни, додека вештачката интелигенција ќе преземе дел од управувањето со сообраќајот, потрошувачката и перформансите на мрежата.
Сепак, аналитичарите предупредуваат дека NOKIA сè уште работи во високо конкурентна индустрија, со силен притисок врз цените и огромни инвестиции потребни за развој на нови технологии.
Дополнително, револуцијата на вештачката интелигенција во телекомуникациите е сè уште во раните фази и не е сигурно колку брзо операторите ширум светот ќе бидат подготвени да инвестираат во целосно нови мрежни системи.
Сепак, трансформацијата на NOKIA останува една од поинтересните приказни во технолошкиот свет: од компанија која некогаш доминираше на пазарот на мобилни телефони до тивок гигант кој денес напојува голем дел од глобалната дигитална инфраструктура.
(Bizlife)
