Ford повторно вработи некои од своите ветерани инженери откако системите базирани на вештачка интелигенција не успеаја да го достигнат нивото на знаење, искуство и точност на човечките експерти.
Американскиот производител на автомобили воведе вештачка интелигенција во неколку делови од своето работење, вклучително и контрола на квалитетот, очекувајќи пониски трошоци и поголема продуктивност. Сепак, раководителите на компанијата потврдија дека во последниtе години повторно вработиле повеќе од 300 искусни контролори на квалитет за да ги компензираат недостатоците на автоматизираните системи.
„Вештачката интелигенција е фантастична алатка, но е добра само колку што се добри информациите што ги користите за да ја обучите“, рече Чарлс Пун, потпретседател за развој на хардвер за возила.
Според него, Ford во последните години не посветил доволно внимание на искуството на своите најискусни инженери, кои учествувале во развојот на повеќе генерации производи. Многу од тие вработени ја напуштиле компанијата пред нивното знаење да се искористи за обука на нови системи.
Ford, како и многу други компании, инвестирал многу во вештачката интелигенција бидејќи очекува технологијата да ја подобри ефикасноста и маржите на профит. Извршниот директор Џим Фарли претходно изјави дека вештачката интелигенција ќе ги остави многу канцелариски работници без работа, додека оперативниот директор Кумар Галхотра објави дека ќе биде распоредена низ целиот индустриски систем.
Компанијата инсталираше околу 900 камери со вештачка интелигенција во своите фабрики, дизајнирани да откриваат проблеми со квалитетот рано и да спречат прекини во синџирот на снабдување.
Форд, сепак, признава дека автоматизираните проверки не ги постигнале очекуваните резултати. Пун објасни дека компанијата погрешно претпоставила дека едноставното воведување на вештачка интелигенција и внесувањето барања за дизајн автоматски ќе доведат до производи со висок квалитет.
Главниот проблем беше што автоматизираните алатки немаа обука и практично искуство на ветераните кои имаа долгогодишно искуство во идентификување грешки преку работа на различни модели и производствени циклуси.
Како резултат на тоа, искусни експерти беа вратени за да помогнат во обуката на системите за вештачка интелигенција и да го пренесат своето знаење на помладите вработени. Ford верува дека автоматизацијата и машинското учење можат да напредуваат само ако се водени од најискусните луѓе.
Промената доаѓа откако Ford се врати на првото место меѓу големите американски производители во студијата за квалитет на возила JD Power Initial за прв пат од 2010 година.
Компанијата вели дека враќањето на врвот барало голема реконструкција на персоналот, вклучително и промени на раководителите во развојот, синџирот на снабдување и производството, како и повторно вработување на приближно 300 ветерани со децениско искуство.
(BBC/Benchmark)
(фото: PExels)
