Microsoft подготвува нов, масовен бран отпуштања, што ќе влијае на илјадници вработени ширум светот на самиот почеток на новата фискална година на компанијата. Според информациите објавени од водечките бизнис медиуми, повикувајќи се на добро информирани извори, Microsoft планира да ја намали вкупната работна сила за нешто помалку од 2,5%.
Со оглед на тоа што Microsoft моментално вработува околу 228.000 луѓе, оваа одлука значи дека приближно 5.500 работници ќе ги изгубат своите работни места. Ова е продолжение на корпоративната реорганизација што започна минатото лето (во јули 2025 година), кога компанијата отпушти околу 4% од вкупната работна сила (речиси 9.000 луѓе).
Иако намалувањата ќе се почувствуваат во различни сектори на компанијата, главниот удар ќе го примат одделите за продажба и консалтинг, како и Xbox.
Ситуацијата во одделот Xbox предизвикува најголема загриженост кај аналитичарите и индустријата. Новиот извршен директор, Аша Шарма, неодамна испрати интерeн меморандум до вработените во кое отворено повика на итно рестартирање на бизнисот и промена на стратегијата. Во таа прилика таа откри дека маржата на профит на овој сектор паднала на критични 3%.
Во текот на изминатите пет години Microsoft потроши повеќе од 20 милијарди долари за развој на гејмерска содржина и субвенционирање на хардвер (без да се смета гигантската аквизиција на Activision Blizzard), додека годишните приходи на дивизијата се намалија за речиси половина милијарда долари.
Во обид да ги запре загубите Microsoft неодамна ги зголеми глобалните цени на своите Xbox конзоли по трет пат во една година (за 100 до 150 долари), оправдувајќи го ова со драстичен скок на цените на меморијата и сродните компоненти на глобалниот пазар. Се очекува дека новите намалувања ќе донесат и драстични намалувања на маркетинг буџетите, откажувања на одредени игри, па дури и потенцијално затворање или спојување на некои интерни гејмерски студија.
Иако Microsoft официјално одбива да коментира за овие обвинувања, стратегијата на компанијата целосно го одразува трендот што го зафати целиот силиконски сектор. Во истата атмосфера Meta и Amazon веќе отпуштија десетици илјади работници оваа година.
Технолошките гиганти масовно пренасочуваат милијарди долари од оперативни трошоци кон капитални инвестиции. Сите пари се инвестираат директно во изградба на центри за податоци со вештачка интелигенција, купување графички чипови и развој на софтвер за вештачка интелигенција.
Во внатрешните кругови менаџментот на компанијата сè повеќе нагласува дека напредните агенти за вештачка интелигенција и интегрираниот асистент Copilot стануваат толку ефикасни што едноставно ги прават многу традиционални и административни улоги во корпоративниот синџир застарени и технолошки излишни.
Овој бран на отпуштања е делумно ублажен со првата официјална програма за доброволно пензионирање во 51-годишната историја на Microsoft. Програмата беше лансирана во април оваа година, а околу една третина од постарите работници кои ги исполнија условите ги прифатија понудените пакети за отпремнина. Ова донекаде го намали конечниот број на луѓе кои ќе бидат отпуштени.
(GSMArena)
(фото: Flickr)
