На Широк Сокак се вперени сите погледи, и тоа во нешто што Битола досега не го видела – иднината која буквално „оживува“ пред очите.
Наместо класични фотографии во излозите, најпознатата битолска улица стана сцена за технологија од 21 век. Студенти, професори, деканот и ректорот на Факултетот за информатички и комуникациски технологии при Универзитетот „Св. Климент Охридски“ -Битола се појавија како реалистични тродимензионални холограми преку современа Holobox технологија. Зад оваа впечатлива сцена стои јасна приказна за луѓето и тимот што ја донесоа во Битола.
Овој впечатлив проект е целосна реализација на компанијата MIKRODEL и тимот на битолчанецот Димче Поповски, како подарок за Факултетот за информатички и комуникациски технологии. Со оваа иницијатива, MIKRODEL уште еднаш покажува дека знаењето, технологијата и визијата создадени од Битола можат да имаат светски карактер.
„Технологијата сама по себе не е иднината, иднината е во луѓето кои знаат да ја искористат за да создадат нешто ново. Нашата цел не беше само да поставиме еден уред на Широк Сокак, туку да поставиме идеја дека и од Битола можат да тргнат решенија кои ќе изгледаат природно и во најсовремените светски средини. Ако некогаш велевме дека светот доаѓа кај нас, сега можеме да кажеме дека и ние испраќаме дел од нашата визија кон светот“, вели Димче Поповски.
Во 2019 година компанијата MIKRODEL е формирана во Берлин, Германија, со јасна цел – развој на современи дигитални технологии кои го поврзуваат просторот, комуникацијата и новите начини на презентација. Денес MIKRODEL работи во областа на Digital Signage технологиите, LED системите и холограмските решенија, а преку овој проект дел од таа светска визија се враќа токму во Битола. Во реализацијата се вклучи и академската заедница: проектот е реализиран во соработка со студентите и професорите од Факултетот за информатички и комуникациски технологии при УКЛО, кои активно учествуваа во создавањето на ова современо технолошко решение.
Иницијатор на концептот е професорот Никола Рендевски, а проектот претставува пример како академијата и реалниот сектор можат заеднички да создаваат иновации со практична примена.
„Учеството во развојот на холограмската промоција е одлична можност стекнатите знаења од наставата да ги примениме во реален проект. Работата со професорите и со инженерите од МИКРОДЕЛ ни овозможи да стекнеме практично искуство и нови вештини“, истакнува Валентин Стојановски, еден од студентите вклучени во проектот.
Деканот на ФИКТ, проф. д-р Благој Ристевски, нагласува дека ваквите иницијативи ја потврдуваат определбата на Факултетот за современи технологии и иновативни пристапи во наставата и промоцијата. „Преку партнерство со компаниите можеме да создадеме уникатни решенија кои ја зголемуваат препознатливоста на ФИКТ и УКЛО и дополнително ги мотивираат идните студенти“, посочува проф. д-р Ристевски.
Од компанијата MIKRODEL истакнуваат дека оваа реализација со ФИКТ и УКЛО е значаен чекор кон поширока примена на современите технологии во високото образование и доказ дека соработката меѓу знаењето и индустријата може да создаде решенија со светски потенцијал.
За современата промоција со особено задоволство зборува и ректорот, проф. д-р Игор Неделковски, кој истакнува дека проектот е резултат на заедничката работа на студентите, професорите и компанијата MIKRODEL.
„Ваквите иницијативи се доказ дека Универзитетот успешно ги поврзува науката, образованието и стопанството во создавање современи решенија со реална примена. Станува збор за прва ваква имплементација во Македонија, што претставува значајна придобивка и потврда за развојниот и технолошкиот потенцијал на УКЛО“, вели ректорот проф. д-р Игор Неделковски.
Ова е само почеток. Поставувањето на Holobox-от на Широк Сокак не е само технолошка иновација – тоа е најава за нова, уште подлабока соработка меѓу академската заедница и MIKRODEL, како и прв чекор кон проекти со амбиција и потенцијал на светско ниво. Холобокс технологијата која сега се гледа на Широк Сокак е истата насока на развој што се користи во најмодерните светски градови, од големи транспортни и јавни простори, како аеродромот во Њујорк, па сè до најпознатата битолска улица, каде иднината добива ново лице.
Со овој чекор, Широк Сокак станува место каде традицијата и иднината се среќаваат. Ова не е само поставување на еден уред, ова е почеток на една технолошка револуција, доказ дека домашната експертиза и младите можат да бидат дел од глобалната приказна. Битола денес испраќа порака: иднината не мора да се чека, таа може да се создава тука. И кога следен пат ќе поминете по Широк Сокак, не се чудете ако некој ве „поздрави“ од иднината. Во Битола, иднината веќе започна.
