Економистот кој ја предвиде кризата во 2008 година верува дека вештачката интелигенција и роботиката ќе ја зголемат продуктивноста и ќе бараат прераспределба на богатството.
Професорот по економија од Њујорк, Нуриел Рубини (Nouriel Roubini), познат како „Д-р Дум“ (Dr. Doom) поради неговите често темни проекции, презентираше невообичаено оптимистичка прогноза за влијанието на вештачката интелигенција, која, според него, може да донесе глобален економски раст од дури десет проценти, пишува Политика.
Во разговор за Блумберг, Рубини проценува дека годишниот раст на глобалната економија би можел да забрза од сегашните два до четири проценти на приближно шест проценти до 2040 година, а потоа да се приближи до десет проценти до 2050 година.
Тој истакнува дека развојот на вештачката интелигенција и роботиката би можел драматично да ја зголеми продуктивноста во наредните децении и да доведе до економски раст каков што светот никогаш порано не видел, но и да донесе големи промени на пазарот на трудот.
Рубини верува дека поради ова, владите ширум светот ќе мора да воведат некаков вид на универзален основен приход (УОП), односно редовни исплати на граѓаните кои не зависат директно од вработувањето. Според него, општеството ќе мора да најде начин да дистрибуира дел од огромното богатство што го создава вештачката интелигенција на пошироката популација.
Владите би можеле да ги оданочат најголемите победници од револуцијата на вештачката интелигенција или дури и да учествуваат во сопственоста во технолошките компании, додава економистот.
Рубини стана познат на пошироката јавност како еден од ретките експерти кои предупредија на можноста за голема финансиска криза во 2008 година. Потоа изјави дека прекумерното задолжување, падот на кредитните стандарди и „балонот“ на пазарот на недвижности во Соединетите Американски Држави ќе доведат до сериозни потреси на пазарот. Неговите предупредувања во тоа време беа сметани за премногу песимистички од многу инвеститори и економисти, но по колапсот на пазарот на недвижности се покажа дека тој бил еден од првите што ги препознал клучните ризици.
Фото – Pxfuel
