Откако Рено ја намали цената на електричниот Твинго под 20.000 евра, европските производители бараат начин да направат уште подостапни модели и да бидат во чекор со кинеската конкуренција.
Електричните автомобили наскоро би можеле да станат многу подостапни во Европа. Додека кинеските производители сè поагресивно го освојуваат пазарот со прифатливи електрични модели, европските гиганти бараат начин да одговорат – а едно од најважните решенија треба да пристигне од Италија.
Рено успеа да ја намали цената на новиот електричен Твинго под границата од 20.000 евра, но дури ни тоа веќе не е доволно за рамноправна борба со конкурентите од Истокот. Аналитичарите и производителите сè повеќе укажуваат дека на европскиот пазар би му биле потребни електрични автомобили со цена од околу 15.000 евра за да бидат достапни за широк спектар на клиенти.
Најголемиот притисок врз европските производители доаѓа од два правци – кинеската конкуренција и сè построгите еколошки правила на Европската Унија. Според сегашните цели, просечната емисија на штетни гасови од сите нови автомобили од една марка мора значително да се намали до 2030 година – од сегашните 93,6 на само 49,5 грама на километар.
Токму затоа производителите се обидуваат да најдат рамнотежа помеѓу скапиот развој на електрични возила, послабата побарувачка од страна на клиентите и обврските наметнати од европските регулативи. Таборот на Рено предлага резултатите на производителите да не се набљудуваат само низ една календарска година, туку како просек во периодот од 2028 до 2032 година. На овој начин, компаниите би добиле дополнително време да ја зголемат продажбата на електрични модели и да избегнат високи финансиски казни доколку пазарот не ја следи планираната динамика на преминување кон електрични возила.
Проектот на Стелантис за автомобил од 15.000 евра
Клучниот одговор на европската автомобилска индустрија би можел да дојде од Италија. Проект наречен „E-Car“ треба да започне во фабриката на групацијата Stelantis во Помиљан од 2028 година. Целта на овој проект е развој на нова платформа и производство на компактни градски електрични автомобили чија почетна цена треба да биде под 15.000 евра.
Досега официјално се потврдени два модели. Првиот е новиот Citroen 2CV, односно модерната електрична верзија на култниот „Spaček“, додека Fiat треба да претстави нов мал автомобил кој, според најавите, би можел да се нарече Koala. Сè уште има многу непознати работи околу третиот модел од оваа серија. Првично се шпекулираше дека би можел да биде автомобил со брендот Peugeot, но шефот на тој бренд, Ален Фав, во едно интервју го изрази своето незадоволство што Peugeot не е вклучен во проектот. Кинеската марка Leapmotor, која соработува со Stellantis, исто така беше спомената како можен кандидат за овој проект, но таа опција во моментов не е во преден план.
(Kamatica.rs)
Фото – Wikimedia
