Со грант од 149 милиони евра од Европската Унија ќе се финансира изградбата на третата фаза од железничката пруга кон Бугарија, која опфаќа изградба на прекуграничниот тунел на Коридор 8. Делницата е долга 22 километри, започнува од Крива Паланка и продолжува кон бугарската граница.
Покрај грантот, за проектот се обезбедени и 175 милиони евра кредити од Европската инвестициска банка (ЕИБ) и Европската банка за обнова и развој (ЕБОР). Договорите за финансирање денеска беа потпишани во Владата.
Директорот на Македонски железници, Синиша Ивановски, изјави дека станува збор за најсложениот инфраструктурен проект во земјава во последните неколку децении.
„Пругата ќе биде едноколосечна и наменета и за патнички и за товарен сообраќај. На трасата долга 22 километри ќе има 21 тунел со вкупна должина од 7,8 километри, како и 52 мостови и вијадукти долги околу пет километри. Тоа значи дека повеќе од 60 проценти од трасата ќе биде во тунели и на мостови, поради што ќе бидат потребни дополнителни геодетски, геолошки, геотехнички и хидролошки истражувања“, рече Ивановски.
Министерот за транспорт и врски, Александар Николоски, оцени дека проектот е еден од најзначајните инфраструктурни за државата и важен чекор кон остварување на стратешката цел Македонија да стане транспортна раскрсница на Балканот.
„По речиси две години работа успеавме да стигнеме до реален и остварлив проект. Особено е важно што постигнавме договор со Бугарија за изградба на прекуграничниот железнички тунел што ќе ги поврзе двете држави“, изјави Николоски.
Во следниот период треба да биде распишан тендер за избор на изведувач, а според најавите на Министерството за транспорт, градежните работи би требало да започнат до крајот на годината. Железничкиот Коридор 8 е дел од европската транспортна мрежа и има стратешко, економско и геополитичко значење за поврзување на Јадранското и Црното Море.
Првата делница од Куманово до Бељаковце беше пуштена во употреба во јануари 2025 година, додека изградбата на втората делница, од Бељаковце до Крива Паланка, е во тек. Таа се финансира со заем од ЕБОР и грант од Европската Унија преку Инвестициската рамка за Западен Балкан.
Фото – Flickr
