Роботите се дел од многу поголем кинески план за воспоставување на Меѓународната истражувачка станица за Месечината (ILRS), која се очекува да биде изградена во текот на следната деценија, со цел основната инфраструктура да биде воспоставена до 2035 година.
За разлика од традиционалните ровери на тркала, роботите со четири нозе би можеле полесно да се движат низ карпи, стрмни падини, кратери и други пречки на нерамната површина на Месечината. Нивните нозе им овозможуваат да се прилагодат на теренот на начин со кој возилата на тркала имаат многу поголем проблем.
Планот е ваквите роботи да извршуваат различни задачи – од извидување и мапирање на теренот до транспорт на материјали и помагање во изградбата на објекти. Тие исто така би можеле да ја проверуваат опремата и инфраструктурата и да извршуваат задачи пред астронаутите да пристигнат на одредена локација.
Една од главните причини за користење на роботи е исклучително непријателската средина на Месечината. Температурите драстично се менуваат, нема атмосфера за заштита од зрачење, а лунарниот реголит претставува дополнителен проблем за луѓето и опремата.
Затоа, Кина сака автономни машини да го вршат поголемиот дел од подготвителната работа, што би го намалило времето што астронаутите треба да го поминат надвор од заштитените живеалишта.
Кина веќе развива други видови роботи за идна лунарна станица. Порано оваа година беше претставен робот со хуманоиден горен дел од телото поставен на подвижна платформа, дизајниран за задачи како што се склопување инфраструктура, транспорт на материјали, собирање примероци и одржување на опрема.
Особено важен дел од планот на Кина е да транспортира што е можно помалку градежен материјал од Земјата, бидејќи секој килограм товар што треба да се испрати на Месечината е многу скап. Наместо тоа, Кина сака да го користи лунарниот реголит – прашина и камења од површината на Месечината – како градежен материјал.
Мисијата Chang’е 8, која треба да претходи на изградбата на станицата, е да тестира технологии за користење на локални ресурси, вклучително и можноста за изработка на градежни елементи од лунарните материјали. Исто така, се планира да се тестира технологија слична на 3D печатењето, која би можела да се користи за изработка на лунарни блокови или тули од реголит.
Идејата е дека идните роботи ќе користат вакви елементи за изградба на инфраструктура, наместо да транспортираат цели структури од Земјата.
ILRS е дизајниран како долгорочна научна база на површината и во орбитата на Месечината, наменета за истражување, експерименти, набљудување на вселената и тестирање на можностите за користење на лунарните ресурси.
Проектот го води Кина во соработка со Русија и други меѓународни партнери, а изградбата на главната инфраструктура е планирана да биде завршена во текот на 2030-тите.
(021)
(фото: Raw Pixel)
