Вработеноста во германската автомобилска индустрија падна во првата половина од 2026 година на најниско ниво за повеќе од две децении, соопшти во петокот Германскиот федерален завод за статистика Дестатис.
На крајот од првата половина од годината, во секторот биле вработени 691.500 луѓе, што е за 42.300 или 5,8 проценти помалку од претходната година, објавува агенцијата Анадолу. Падот на вработеноста беше најголем меѓу главните индустриски сектори во Германија, со повеќе од 200.000 вработени, и го намали бројот на работници во автомобилската индустрија на најниско ниво од 2005 година.
И покрај падот, автомобилската индустрија остана втор најголем индустриски работодавач во Германија, зад машинството, кое вработуваше 905.900 луѓе на крајот од првата половина од годината.
Бројот на вработени кај производителите на моторни возила и мотори се намали за 6,1 процент на годишно ниво, на 429.200, додека бројот на вработени кај производителите на делови и опрема за возила се намали за 7,6 проценти, на 219.500.
Спротивно на тоа, бројот на вработени во производството на каросерии, надградби и приколки се зголеми за десет проценти, на 42.800. Во германската преработувачка индустрија како целина, на крајот од првата половина од годината, биле вработени 5,29 милиони луѓе, што е за 144.100, или 2,7 проценти, помалку во однос на истиот период минатата година.
Вработеноста се намали и за 3,8 проценти во производството на метални производи, 3,7 проценти во производството на основни метали, 3,6 проценти во хемиската индустрија и 3,4 проценти во производството на електрична опрема. Во машинството, бројот на вработени е намален за 2,7 проценти, додека помали падови се забележани во производството на пластика, прехранбената индустрија, како и производството на компјутери, електронски и оптички производи.
Фото – Wikimedia
