Јапонци развија преносен клима уред кој активно го лади телото. Новата генерација уреди може да работи со часови без полнење, а може да се користи и за греење во текот на зимата.
Ова лето Европа се соочи со екстремни топлотни бранови, со рекордни температури и долготрајни суши. Во такви услови расте интересот за уреди што можат да ги ладат луѓето дури и кога не се во климатизиран простор.
Во последните петнаесет години особено се развиени мали преносни уреди за ладење. Во Јапонија масовното производство на работни јакни со вградени вентилатори започна во 2010 година, додека Sony ја претстави првата генерација на уредот Reon Pocket во 2020 година.
Ова е личен уред за ладење што се носи околу вратот и кој активно го лади телото, наместо само да дува воздух. Првите верзии имаа ограничувања, првенствено кратко траење на батеријата и потреба од посебна долна маица со џеб на грбот. Sony оттогаш го надгради уредот и ја претстави петтата генерација, Reon Pocket Pro Plus, која може и да лади и да грее.
Уредот работи со помош на метална плоча од не’рѓосувачки челик што е поставена на задната страна од вратот. Го користи ефектот на Пелтие за брзи промени на температурата и не користи вода, фреон или други гасови за ладење.
Според производителот, ладењето е околу 20 проценти поефикасно од претходните верзии, а температурата на контактната површина може дополнително да се намали благодарение на подобрениот алгоритам и системот за дисипација на топлина.
Уредот има и сензор што ја мери температурата и влажноста на воздухот и автоматски го прилагодува режимот на работа според условите на корисникот.
Времетраењето на батеријата зависи од интензитетот на работа. Во автоматски режим може да работи околу 15 часа, на највисоко ниво на ладење околу пет и пол часа, додека на најниско ниво може да трае повеќе од 30 часа. Батеријата се полни преку USB-C кабел. До 80 проценти од нејзиниот капацитет се полни за околу два часа, додека целосното полнење трае околу три часа.
На најсилното подесување уредот може да ја намали температурата на подлогата за ладење за околу 10 до 13 степени во споредба со моменталната телесна температура на корисникот.
Sony започна со продажба на новиот модел во Азија во мај 2026 година, а потоа и во САД. Продажбата во Европа беше објавена подоцна. Онлајн цената се движи од 211 до 240 евра.
(N1)
(фото: YouTube)
