Притисокот врз светскиот пазар на нафта и гориво може дополнително да се зголеми, а може да потрае и до две години за да се обноват глобалните залихи исцрпени за време на кризата. Ова го предупреди Амин Насер, директор на Сауди Арамко, најголемата светска нафтена компанија, наведувајќи дека нарушувањата предизвикани од војната на Блискиот Исток веќе сериозно го оптовариле целиот систем на снабдување.
По почетокот на американско-израелската војна против Иран на крајот на февруари, Иран практично го затвори Ормутскиот теснец, низ кој минува голем дел од светската трговија со нафта. Затоа, снабдувањето со сурова нафта и рафинирани горива е дополнително ограничено. Земјите од Г7, под притисок на американскиот претседател Доналд Трамп, одлучија да ослободат 100 милиони барели нафта и дизел од стратешките резерви, но Насер предупредува дека ова е само привремено решение, пренесува Ројтерс.
Според неговите зборови, речиси три милијарди барели нафта исчезнале од светскиот систем на снабдување од почетокот на конфликтот, додека околу една милијарда барели веќе се повлечени од резервите. Откако Ормускиот теснец ќе биде целосно отворен и ќе се врати довербата на пазарот, ќе биде потребно истовремено да се задоволи редовната потрошувачка и да се надополнат залихите.
Само враќањето на исцрпените резерви би значело дополнителна побарувачка од околу два милиони барели дневно во текот на следните 18 месеци, додека светската потрошувачка моментално изнесува нешто над 100 милиони барели дневно.
Сауди Арамко би можел релативно брзо да го зголеми производството. Насер вели дека Саудиска Арабија би можела да го активира својот максимален одржлив капацитет од 12 милиони барели дневно во рок од неколку дена, бидејќи нејзините стратешки резерви и флексибилност на производството остануваат недопрени.
Сепак, проблемот е што голем дел од преостанатите залихи во светот всушност не се достапни на пазарот. Од приближно шест милијарди барели складирана нафта, дури 90 проценти се во цевководи или претставува минимална количина потребна за нормално функционирање на складиштата.
Затоа, Сауди Арамко се обидува да најде начини да ги ублажи ефектите од затворањето на Ормускиот теснец. Компанијата разгледува дополнителни извозни правци што би можеле да го заобиколат клучниот морски премин на Саудиска Арабија, како и поголема употреба на магацини во други земји.
(Bizznis.rs)
Фото – Trevor MacInnis, CC BY-SA 2.5 https://creativecommons.org/licenses/by-sa/2.5, via Wikimedia Commons
