Новинарот на Bloomberg, Марк Гурман – високо доверлив извор на информации за Apple – тврди дека компанијата од Купертино соработува со LG на низа нови производи за паметен дом. Сè уште не е сосема јасно каква ќе биде конкретната улога на Apple, со оглед на тоа што производите наводно ќе го носат името: LG Video Doorbell Wired, LG Floodlight Cam, LG Outdoor Cam Plug-In, LG Smart Deadbolt Lock, LG Smart Thermostat и LG Temperature Sensor.
LG неодамна побара регулаторно одобрение за овие производи од FCC и UL Solutions. Гурман наведува дека LG ќе се грижи за производството и корисничката поддршка, иако Apple до одреден степен бил вклучен во нивниот развој. Apple и претходно учествувал во слични соработки, работејќи со компании како Belkin и Logitech на разни додатоци.
Ваквиот аранжман му овозможува на Apple брзо да го прошири својот екосистем без да ги презема целосните трошоци и сложеноста поврзани со производството и поддршката на широк спектар на додатоци, како што забележува Гурман. Apple исто така може да помогне во обликувањето на дизајнот на производите, прилагодувањето на функциите и надгледувањето на инженерскиот развој, а сето тоа да се одвива далеку од очите на јавноста.
Корисник на социјалната мрежа X ги откри вистинските дизајни на паметната брава (LG Smart Deadbolt Lock) и паметниот термостат (LG Smart Thermostat).
Бравата поддржува автоматско отклучување, функција за отклучување со допир, напојување во итни случаи и главни (мастер) кодови, а е компатибилна со растојанија од работ на вратата до центарот на бравата (backset) од 60,3 mm и 69,9 mm. Доаѓа со два механички клуча. Паметниот термостат нуди поставки за дисплејот (вклучувајќи ја функцијата Far Sight), приказ на влажност, осветленост и јазик, како и опции за калибрација на температурата и прилагодување на отстапувањето на температурата.
Гурман вели дека овие производи нема да бидат претставени во следните неколку месеци.
Многу од овие производи на LG за паметен дом ќе поддржуваат Wi-Fi, Bluetooth, Thread и Matter, додека за паметната брава се очекува да поддржува и UWB технологија за функцијата за автоматско отклучување.
(Klix.ba)
(фото: Chat GPT)
