Во Русија е испечатена верзија од вториот том на романот „Мртви души“, создадена со помош на вештачка интелигенција. Примероците наменети за пошироката јавност почнаа да пристигнуваат во книжарниците низ земјата оваа недела, изјави за ТАСС раководителот на проектот и писател Владислав Отрошенко.
Отрошенко наведе дека готовите примероци се веќе во рацете на новинари и експерти. Според него, работата на изданието траела година и пол, а вештачката интелигенција го генерирала не само текстот, туку и илустрациите. Во подготовката на книгата учествувале писатели и млади уредници.
Раководителот на проектот објасни дека тој го надгледувал почитувањето на поетиката на Гогољ, како и развојот на концептот и заплетот. Тој истакна дека идејата за заплетот потекнува од човек.
Отрошенко, исто така, посочи дека иако вештачката интелигенција е способна да создава дијалози во стилот на Гогољ и хумористични ситуации, таа не може самостојно да го напише вториот том без обука и однапред смислен концепт.
Како една од целите на проектот тој го наведе привлекувањето на помладите генерации кон читање на Гогољ и проучување на неговото книжевно наследство.
Во август 2024 година руската компанија Sber најави проект за создавање верзија на вториот том на „Мртви души“ со користење на невронската мрежа GigaChat и експерти за книжевното наследство на Гогољ.
Во тоа време прес-службата на Sber соопшти дека историчари, книжевни експерти и биографи ја запознаваат невронската мрежа со делата и стилот на писателот, неговите писма, архивските материјали, како и со зачуваните поглавја и нацрти од вториот том.
Гогољ го изгорел ракописот на вториот том од „Мртви души“ во февруари 1852 година. Зачувани се пет недовршени поглавја во форма на нацрт.
(021)
(фото: Pexels/Israyosoy S.)
