Возењето по автопат со брзина од 80 км/ч звучи како лоша шега, но во Швајцарија за оваа можност се разговара сериозно. Причината лежи во сè поголемите проблеми со снабдувањето со гориво, што ги натера властите да разгледаат низа мерки за намалување на потрошувачката.
Оваа информација ја пренесе швајцарскиот јавен сервис SRF, повикувајќи се на податоци од Федералната канцеларија за национално економско снабдување. Ограничувањето на брзината на 80 км/ч би претставувало екстремна мерка која би се применила само во случај на сериозен недостиг на гориво – тоа не е одлука што би стапила на сила веднаш, напоменуваат од SRF.
Проблемите произлегуваат од конфликтите на Блискиот Исток, тешкотиите во транспортот на нафтени деривати по реката Рајна, како и предизвиците поврзани со железничкиот транспорт. Швајцарија веќе почна да ги користи своите задолжителни резерви на гориво за да одржи стабилно снабдување на пазарот.
Логиката зад предложената мерка е прилично едноставна: помалите брзини значат помал отпор на воздухот и намалена потрошувачка на гориво. Сепак, вакво ограничување не би се вовело сè додека не се исцрпат поблагите опции за штедење и додека не се потроши значителен дел од стратешките резерви.
Засега нема причина за паника. Ограничувањето на брзината од 120 км/ч останува на сила на швајцарските автопати, а возењето со 80 км/ч моментално е само дел од едно кризно сценарио. Дали тоа ќе стане реалност, ќе зависи од развојот на ситуацијата со енергетското снабдување.
(SEEBiz.eu)
(фото: Pexels/ Danique Weldhius)
